Singabona lukhulu uma I-ANC ingehlisa ukunaka uzuma iqinise ezidingweni zabantu
UMA I-ANC Kwazulu-natal ingasukumela izinkinga ezibhekene nesifundazwe, ngendlela efanayo nogqozi elukhombisa odabeni lowayengumengameli, umnuz Jacob Zuma nomkhonto wesizwe, isifundazwe singabalwa nezihamba phambili ngokuhanjiswa kwezidingo kubantu.
Ayisekho enye into ekhulunywayo ngabaholi bakakhongolose ngemuva kokuba uzuma ememezele ukweseka umkhonto wesizwe.
Indaba isuswe ukuchayiswa kwe-anc umsholozi othe uzokhankasela I-MK njengoba zibheke lukazwelonke nezifundazwe. Manje ukugxila kukakhongolose kuzuma kunobungozi bokusilela emuva komsebenzi wokuphucula izimpilo okubhekene nabaholi baleli qembu abajutshwe kuhulumeni.
Muva nje izingxenye eziningi zihlaselwe yizikhukhula ezidlule nemiphefumulo yabantu.
Kumosheke nengqalasizinda yamanzi neyokuhanjiswa kwendle, okunomthelela ongemuhle ikakhulu olwandle lwasethekwini. Kuthinteke nezikole, ikakhulu ezindaweni eziqhelile emadolobheni amakhulu. Ukubulawa kwabantu nobuholi bomdabu nakho akumile.
Ukube ngempela I-ANC ibingumholi womphakathi, njengoba ijwayele ukuzichaza kanjalo, ibizochitha amandla amancane ekunyundeleni uzuma kodwa igxile ezintweni eziwumgogodla wokunika abantu impilo engcono.
Lokhu kwakha isithombe sokuthi I-ANC ibeka eqhulwini izinkinga zayo zepolitiki, bese ezabantu zize ngemuva. Udaba lukazuma luphinde lwanekela izwe ukuthi kalukho ubumbano nokuzakha kabusha kwi-anc.
Izolo umphakathi wasephoenix ububhikishela izidingo. Nakweminye imiphakathi kuningi ukungenami ngenxa yokungasukunyelwa ngomfutho kwezinto ezonakele.
Kungadala umehluko umkhulu uma singabona umfutho okhonjiswa ngabaholi odabeni lukazuma nemk, nasekusukumeleni izidingo zomphakathi.