Kuyasihlukumeza ukuvinjwa osomatekisi emgwaqweni
MHLELI: Kunento esiphatha kabi yokuthi osomatekisi basivimbe uma siyozicelela ukugitsheliswa yizimoto emigwaqweni.
Leyo nto iyasilimaza ngoba sikwenza lokho ngoba kunezizathu ezinzulu, njengokuthi nje awunamali eyanele yetekisi, ujahe ukuyongena emsebenzini, ujahe ukuya kwinhlolokhono, ujahe ukuya enkantolo njalonjalo.
Isuke itekisi izogcwala nini usungaze ungawutholi umsebenzi ngenxa yosomatekisi abangathunywanga yithi ukuthi bathenge izimoto zabo. Nohulumeni kulolu daba siyafisa asicacisele ukuthi imipheme yokukhosela ayakhe eceleni komgwaqo u-r22, ngeyosomatekisi yini ukuthi basivimbe khona?
Uma kungukuthi kusemthethweni ukuvinjwa kwethu abasikhombise lowo mthetho osho njalo. Ukuya kwethu ukuyocela usizo lokugitshezwa wukuthi sisuke sisayofuna amatoho. Sizobuye sigibele kuwo amatekisi sibazame nabo uma sesiqashiwe ukuze benze inzuzo kodwa hhayi le yempoqo.
Abathunywanga yithi emagaraji abangalokhu besibalisela ngokuthi imoto iyakhokha. Yingakho singenazo ngoba asinawo amandla azo ngakho ayingacindezelani kweyokucela usizo lokugitsheliswa ezimotweni ezincane okanye emalolini.
Sicela inkosi yakwambila neziphathimandla zonke basibizele inguyazana basihlanganise nosomatekisi sizobaphonsa imibuzo ngokuthi basihlukumezelani ngoba abathunywanga yithi ebhizinisini.
Sakha isizwe asingahlukumezani.
Kanti le nkululeko okwakukhulunywa ngayo iyiphi uma sesizocindezelwa abantu abangomakhelwane?
Siyacela iziphathimandla zingenele ngoba ngisho ugula uma uthi uyomvusa owetekisi ebusuku uthi hamba emavenini wona lawa abangawafuni ukuthi siwagibele okusho ukuthi bathanda imali yethu hhayi ngoba sisizana.
Siyawathanda amaveni ngoba asithwalela impuphu nosimende nakho konke okusindayo. Baze bahambe ezindaweni ezinenhlabathi kwazise phela asinamigwaqo lapha.
Ayisukunyelwe le nto isiqalile iyagqilaza.