Ubonga umdali ngengoma opikwe nguchris Brown
INTOMBAZANE yasenanda, eqhakaziswe yisihlabani somculi wase-usa, ikhiphe ingoma yokubonga unkulunkulu nomphakathi.
Unaledi Aphiwe Mnyongwane (17), uzwakala engomeni kachris Brown ethi Shooter, eboshelwe kwi-albhamu yakamuva ethi 11:11.
Muva nje unaledi ukhiphe ingoma ethi Ngiyabonga.
Echaza ngeculo unaledi owenza u-grade 12 ekhethokuhle High, uthe lingaphezu komculo kodwa liwumthandazo.
Ufanise ingoma nomkhuleko ophuma ekujuleni kwenhliziyo yakhe, umnkenenezo ngabantu ahlangane nabo nothando olukhulu lalokhu akwenzayo.
"Phezu kwakho konke, ngiyabonga ngephimbo nangothando olujulile lomculo unkulunkulu angibusise ngalo." Izinhlamvu zengoma zihamba kanje: "Ngibonga unkulunkulu Ngangiphe Khona. Ngibonge unkulunkulu Ngangenzele Khona. Ngoba Abanye Bayalifisa Lelithuba Kodwa
Abalitholi ......... ”
Unaledi unxuse abantu ukuba bahlanganyele naye ohambweni lwakhe lokubonga impumelelo yakhe emculweni. Intokazi ikhipha le ngoma nje, yingoba u-2023, bekuwunyaka wayo.
Ngaphandle kokumpika kwi-albhamu, uchris Brown umkhokhele u-$3000 (okuyimali engaphezu kuka-r50 000) ngenxa yokusebenzisa iphimbo lakhe futhi ulotshwe njengomunye wababhali bengoma.
Lokho kusho ukuthi uma iculo lidlalwa emisakazweni nakwezinye izindawo, unaledi Aphiwe uzohlomula.
Empeleni kuqale ngo-2022, ngesikhathi uchris Brown esabalalisa ezinkundleni zokuxhumana i-video kanaledi ecula ingoma kabig Zulu ethi Ubaba Ulala Nami.
Kusukela lapho impilo kanaledi Aphiwe ayibange isabheka emuva. Usanda kuhlabana ngomklomelo wetop Influencer, emqhudelwaneni abeqokwe kuwo noblack Coffee, nozakes Bantwini, i-2023 Briefly News Entertainment Awards.
Unaledi uqophe nezinye izingoma okubalwa nekanomfundo Moh ethi Uyangijabulisa, nekafezeka Dlamini ethi Zojik’izinto.