Umotale nenselelo kwipirates nechiefs ngemiqhudelwano yecaf
OYINKAKHA ye-orlando Pirates, u-edward “Magents” Motale, ubona kubalulekile ukuthi izingqungqulu zasesoweto, ikaizer Chiefs nepirates, zikulwele ukusika iphethini kozakwabo imamelodi Sundowns ngokudlala njalo futhi zihambe ibanga emiqhudelwaneni yeconfederation of African Football (Caf).
Uthe lokhu kuzokwenza ibafana Bafana ibe neqembu eliqinile kuyona yonke imiqhudelwano.
Umotale usho kanjena nje, ibafana Bafana eyibambe kwi-africa Cup of Nations eqhubekayo e-ivory Coast, ibophele abadlali abangu-10 besundowns. Iningi labo linamava okudlala kwicaf Champions League.
Isundowns, efinyelele kowandulela owamanqamu wechampions League ngesizini edlule, izibule ngesicoco se-african Football League(afl) ngokuguqisa iwydad Casablanca yasemorocco ngonovemba nyakenye.
“Isundowns njengamanje yiyona enabadlali abaningi kwibafana Bafana ngoba iningi labo linesipiliyoni sokudlala kwicaf Champions League. Kwibafana Bafana yango-1996 eyawina i-afcon, ipirates yayinabadlali abane (ezibala naye), ichiefs inabadlali ababili, isundowns inabadlali abahlanu, bese kuba ababedlala e-europe. Kodwa kuleso sikwati abadlali bepirates yibona ababenisipiliyoni esikhulu sokudlala imidlalo yecaf njengoba babesanda kuwina icaf Champions League futhi lokho kwayisebenzela ibafana Bafana.
“Yinto engayisebenzela futhi nebafana Bafana yakulo nyaka ngenxa yalaba badlali besundowns abaningi esikwatini nabamanye amaqembu, nalaba abadlala e-europe,” kusho umotale, owayeseqenjini lepirates elanqoba ichampions League ngo-1995 nelebafana elanqoba i-afcon ngo-1996.
“Ngakho-ke kubalulekile ukuthi ipirates nechiefs babhukule, bashintshe ukwenza, benze njengoba kwenza isundowns kwichampions League, ngokuthi nabo bakulwele ukuhamba ibanga kunanoma yimuphi umqhudelwano wecaf, noma ngabe iconfederation Cup ngoba lokho kuyolisiza kakhulu iqembu lethu ibafana Bafana.”
Kule sizini, ipirates ikhishwe ingakafiki esigabeni samaqoqo echampions League. Ikhale ngaphansi kwijwaneng Galaxy yasebotswana sekushaywa amaphenathi.
“Kudumazile ukuphuma ekuseni kwepirates kwichampions League kule sizini kodwa ngiyafisa sengathi ngesizini ezayo ingabuyela futhi kulo mqhudelwano, ilwele ukwenza kahle njengoba yenza kwiconfederation Cup ifika kowamanqamu ngo-2022.
Nayo futhi ichiefs ngiyafisa ukuthi iphinde ibuye kwichampions League njengoba yakwazi ukufinyelela kowamanqamu ngo-2021. Ngakho-ke nakanjani kufanele phakathi kwechiefs nepirates kube khona oyedwa obuyela kwichampions League ngesizini ezayo,” kusho umotale.
Kuyiwe ekhefini le-afcon ipirates ihlezi endaweni yesihlanu kwi-log yedstv Premiership.lokhu kuzibeka ethubeni lokuzibekisela indawo kwichampions League ngesizini ezayo.
Amakhosi kuyiwe ekhefini le-afcon esendaweni yesithupha kwi-log. Asenalo ithuba lokungena kwichampions League noma kwiconfederation Cup ngesizini ezayo.