Umokoka ujoyine ikilabhu ihollywoodbets AC
IBAMBE ufishi omkhulu ihollywoodbets Athletics Club isayinisa ustephen Mokoka osemele elakuleli amahlandla awu-21 emiqhudelwaneni emikhulu yomhlaba.
Leli phephandaba lihoshe ukuthi ihollywoodbets isayinise lo mgijimi inkontileka yonyaka.
Umokoka ubegijimela iboxer AC. Ngokusho komthombo, ihollywoodbets izomethula ngokusemthethweni kusasa, egoli.
Uqhube wathi abaphathi bale kilabhu bajabule ngendlela eyisimanga ngokugcina bemtholile umokoka osemele iningizimu Afrika kathathu kuma-olympic Games.
Lo msubathi usesenzile isikhathi esimfaka kuma-olympic azoba separis, efrance, phakathi kukajulayi no-agasti nonyaka.
Lokhu kwenzeke ngesikhathi enza u-2:11.30 kwisanlam Cape Town Marathon nyakenye.
" Ihollywoodbets isezinhlelweni zokuba sezingeni lamakilabhu afana nenedbank Running Club.
Ifuna ukuqoqa kwasani kuleli nangaphandle. Ukufika kukamokoka kuzophinde kugqugquzele nabanye abagijimi behollywoodbets.
Nakuba kungacaci kahle kodwa ihollywoodbets imsayinise ngemali enhle. Izimisele ukumgcina aze awagaxe emgibeni amateku," kubeka umthombo.
Ugeorge Sithole, ongumxhumanisi wehollywoodbets AC nomphakathi, akavumanga futhi akaphikanga ebuzwa ngodaba lukamokoka.
"Ngolwesithathu, egoli, sizoba nomcimbi esizomemezela kuwo bonke abagijimi esibasayinisile. Okwamanje ngeke ngikwazi ukuphawula kulokhu ongibuza khona. Amabhomu sizowadedela ngalolu suku engilushoyo," kubeka usithole.
Umokoka ozohlanganisa iminyaka ewu-39 kusasa, uqale ukumela leli ngo-2008 kuma-world Cross Country Championship, e-edinburgh, escotland. Ubeqeqeshwa ngumichael "Sponge" Seme ahlangane naye ngo2005 evaal University of Technology.
Kulo mqhudelwano useye kahlanu. Kumaworld Athletics Championships usemele iningizimu Afrika amahlandla amane.
Umokoka useye kasishiyagalombili kuma-world Half Marathon. Ugcine nyakenye eriga, elatvia walala eka-11. Kuma-olympic uye kwawango-2012 elondon, 2017 erio de Janeiro nango-2021, etokyo, ejapan. Enye impumelelo yakhe wukunqoba kane i-shangai Marathon yasechina ngo2013, 2014, 2016 nango-2017.
Ngo-2022 uphule irekhodi lomhlaba ku-50km enqoba inedbank Runified Breaking Barriers. Wenze esingu-2:40.13. Unyaka odlule uwuvale ngokulala isihlanu emjahweni wasejapan, i-osaka Marathon ngesiwu-2:06.42.