Zihlasimulisa umzimba izinsolo ngothutha abafundi
ZINYANTISA igazi izinsolo zokuthi kukhona abafundi abancane abese bephenduke inkundla yesigilamkhuba ebesethenjwa ngabazali, ukuba sibahambise esikoleni.
Umbiko esibe nawo ephephandabeni izolo uveze ukuthi esikoleni sasendwedwe, kunedlanzana labazali abakhungathekile ngemuva kokuthola ukuthi umshayeli othutha izingane zabo ziya noma zibuya esikoleni - laba abaziwa ngomalume - ubegugumba nalezi zingane kwezinye izikhathi zingayi esikoleni.
Abazali sebethola ngemuva kweziqutshana ezenza bangethembi ukuthi kanti laba bafundi bebephelela kubo lapho bebenukubezwa ngokocansi. Kusenophenyo olwenziwa amaphoyisa ngalokhu kodwa okuqinisa izinsolo wukuthi umlisa usenyamalele ngemuva kokubuzwa abazali ngalokhu.
Izinsolo zihlasimulisa umzimba kwabaningi abazali eningizimu Afrika. Lokhu kudalwa wukuthi luthe chithi saka uhlelo lokuthuthwa kwezingane ezweni.
Le nsambatheka yendaba ibeka obala isidingo sokusebenzisana phakathi kothisha nabazali, ikakhulu ezinsukwini lapho ukuxhumana sekwenziwe kwalula ngamafoni.
Kuyinqubo yezikole eziningi kuleli ukuthi uthisha wekilasi akhiphe umlayezo ngezingane ezingekho esikoleni uma kade enza irejista ekuseni ungene eqoqweni lalabo bazali bezingane azifundisayo. Akusona isimanga lesi. Ngale ndlela, umzali usheshe ezwe ukuthi ingane kayikho esikoleni, uzokwazi ukusheshe asukume.
Ngakolunye uhlangothi nabazali kumele baqinisekise ukuthi bayaluthola ulwazi lokuthi izingane zabo bezikuphi, nini futhi zenzani.
Okusolisayo ukuthi umlisa onukwayo sekunesikhathi enza le mikhuba yakhe abazali bengazi. Le nto ingagwemeka ngokuthi singakhapheli izingane ezikoleni singabe sisazi nokuthi kwenzekani kuzo. Sinethemba lokuthi umthetho uzoshesha umthole umlisa, aboshwe.