Okumbalwa nje ngesilo esahlukunyezwa kakhulu ngabamhlophe
MHLELI: Ngojanuwari uzulu ubebuthene esandlwana enquthu esizweni senkosi PM Mazibuko ezokhumbula ukunqoba amangisi ngojanuwari 22, 1879.
Kule nyanga ufebhuwari kuphela iminyaka ewu-140 kwebuza isilo sasondini inkosi Cetshwayo kampande eyayiphake impi yasesandlwana.
Ngemuva kokushiswa kwesigodlo sasondini ngojulayi 4, 1879 yathunjwa ingonyama isibhace ehlathini lasengome yayogitshezwa umkhumbi olwandle olungemuva kwasesikhaleni yayobekwa epulazini lewayini i-oude Molen ekapa ngaphambi kokuba iwele iyobonana nendlovukazi yamangisi engilandi yaze yabuya ngojanuwari 29, 1883 izwe lakwazulu seliyizicucwana.
Ngeke Mhleli silande wonke umlando ngenkambo kahlamvana bhul’umlilo phezu kwendulinde. Kungagcwala iphephandaba lonke kodwa okwenzeka ngemuva kokushiswa kondi okwesibili ngojanuwari
21, 1883 selushishwa umntwana wasebhanganomo inkosi uzibhebhu yakwamandlakazi, abengwadi babuye bayisusa esigodlweni ondini bayoyibeka eshowe la yakhothamela khona kunezinsolo zokuthi yadliswa umelmoth Osborne okwethiwe ngaye idolobha lasemthonjaneni.
Ingonyama yasondini yakhothama ngofebhuwari 8, 1884 eshowe, kodwa yayotshalwa esizweni sasemachubeni kwashezi enkandla enkosini usgananda kazwekufa. Nazi izindlovukazi zesilo: Ondlunkulu unongazi umaqwabe, usibhamu umasibiya, untweni umahlongwa, unozimpaka umamdlalose, unhlamule umantshangase, uphiwase umantuli, unomvimbi umamzimela, okamajiya umantshangase, okasinqindi umacele, okantobolongwane umashezi, okamadwala umamthembu.
Mhleli ngeke ngiziqede. Okubuhlungu wukuthi ngemuva kokushiswa kwesigodlo amangisi abaphoqa ukuba babuyele emakubo.
Undlunkulu uzilandile umangobese esebuyele esigodlweni sikayise kwasogekle, uyise inkosi usihayo kaxongo yamthatha yayomganisela ukhokhovu lwenyanga ungoqo kamacala kashandu wasemambatheni.
Yathatha izinkomo zakwambatha yaziyisa kwazulu. Ngithe angibhale lokhu okuncane Mhleli njengoba kuyinyanga okwakhothama ngayo isilo esahlukunyezwa kakhulu ngabamhlophe.