Iyaveva i-sadtu ngokuxoshwa kwabophiko lokuphakela izikole
IKHATHAZEKILE i-sadtu Kwazulunatal ngesinyathelo somnyango wezemfundo esifundazweni, sokukhomba indlela abasebenza ophikweni lokudla.
Le nyunyana ithe umnyango uhlela ukuxosha abasebenzi abangu-27, abangu-18 babo abasebenza ekomkhulu lomnyango emgungundlovu nasemahhovisi ezifunda.
Unobhala we-sadtu, unksz Nomarashiya Caluza, uthe nyakenye inhloko yomnyango umnuz Nathi Ngcobo, yagunyaza ukuthi baqashwe ngokugcwele laba basebenzi kodwa manje sebeyaxoshwa.
Uthe bekumele ngabe bayaqashwa kodwa bathukile uma sebekhonjwa indlela.
“Ngeke sithule sibuka kudlalwa ngabasebenzi futhi kungalandelwa nomthetho. Kuke kwaba nezinkinga nyakenye kwangadliwa ezikoleni ngenxa yokuhluleka komnyango. Manje usuxosha abasebenzi.”
Uthe omunye wemisebenzi owenziwa ngabaxoshwayo wukwenza izinhlelo zokukhokhela abaphakela izikole, wukubheka okudliwa ezikoleni ukuthi kuhambisana nokubekwe nguhulumeni.
“Asifuni kubuyelwe esimeni sanyakenye lapho abafundi balamba ngenxa yezinkinga kulolu hlelo. Sinxusa umphathiswa wezemfundo unkk
Mbali Frazer, ukuthi aphenye ngendlela okwenziwa ngayo izinto kuxoshwa abasebenzi kungalandelwa umthetho.”
Unxuse ukuthi kuhoxiswe lokhu kuxoshwa kwalaba basebenzi.
“Sibhalele ungcobo simfuna emhlanganweni ophuthumayo ukuze sixoxe ngalolu daba,” kusho unksz Caluza.
Isekhula engunombolo 19 ka-2024, ekhishwe ngungcobo iveze ukuthi abasebenzi abaqashwe ngo-2019, ukufaka isandla ohlelweni izinkontileka zabo ziyaphela kule nyanga, ezinye ngenyanga ezayo.
Iyalele abaqondisi bezifunda ukuthi baqoke abantu abazosiza kukhokhelwe osonkontileka abaphakela izikole.