Ukungacubungulisisi kungona impilo yengane: ungoti
UKWEHLUKA ngendlela ingane ephimisa ngayo amagama akuchazi ukuthi kunokuthile okungahambi kahle ngayo.
Lokhu kushiwo ngunkk Thandeka Mdlalo oyi-speech Language
Therapist, osanda
kubhala incwadi ethi: Diversity My Call To Action. Uthe njengoba esebenza nezingane ezinenkinga yokukhuluma noma yokuphimisa imisindo ethile, kuvamile ukuthi izingane ezingenayo inkinga enkulu zizithole sekumele zilandele uhlelo lokuthi ziye kuma-speech Language Therapist.
“Emkhakheni wethu ngokuvamile ongoti bakhuluma isingisi futhi nolwazi abalusebenzisayo lususelwa emiqingweni yezempilo yasemazweni aphesheya.
Kuyenzeka ukuthi ukungaphimisi kahle kwengane izinhlamvu ezithile zamagama kudalwa wukuthi ekhaya ikhuluma olunye ulimi olungafani nelusebenzisa esikoleni. Ngakho lokho kuyenza ukuthi ibe nokuphambanisa izinhlamvu, bese othisha bezitshela ukuthi inenkinga, bayithumela kithi ukuthi siyihlole ukuze uma kunesidingo ihanjiswe esikoleni esiyifanele. Kulapho-ke inkinga idaleka khona, uma ungoti engazange acubungulisise kahle umlando wengane,” kusho unksz Mdlalo. Uthe isikhathi esiningi izingane ezivamise ukuthunyelwa kubona ezisuke zifunda isingisi njengolimi lwebele.
“Kuyenzeka ukuthi ingane ekhaya noma empilweni yayo ike yakhuluma olunye ulimi, manje izinhlamvu izididanise uma seyikhuluma isingisi, othisha baze bacabange ukuthi inenkinga yokukhuluma kanti cha wukuthi yehlukile ngoba ikhuluma izilimi eziningi, okuyenza ibuye iziphambanise izinhlamvu.
Lokho kuyenzeka nakumuntu omdala uma esediniwe noma ngezikhathi ezithile, umthole ephambanisa ukuthi umuntu owesilisa (him/he) noma owesifazane (her/she) ngoba vele ezilimini zesinguni uma ukhuluma akufani,” kusho unkk
Mdlalo.
Uthe incwadi uyibhale ngesingisi esilula esingafani nesisetshenziswa uma kubhalwa imiqingo yezempilo ngoba wenzela ukuthi abazali nabo bakwazi ukufunda futhi baqonde, ukuze bezokwazi ukufuna imibono eyehlukene ngaphambi kokuthi bathathe izingane zabo bazihambise ezikoleni zabafundi abakhubazekile, singekho isidingo.
Uthe okunye okumenze wabhala incwadi wukuqwashisa umnyango wezemfundo ngezinkinga ezikhona, ezinye zazo ezidalwa wukuthi izingane zifunda ngolimi okungelona olwebele lube ulimi lokuqala, bese kuphambana izinkomishi ngoba othisha kuyenzeka ukuphambana kwenzihlamvu uma ingane ikhuluma, bakuthathe njengokukhubazeka, bese izingane bezithumela kuma-speech Language Therapist.
“Okunye okwenziwa ngothisha abaqaphelayo ukuthi izinhlamvu kuyenzeka ziphambane uma ingane ifunda ngolunye ulimi, bavele batshele umzali ukuthi ekhaya ingane ayisebenzise ulimi elusebenzisa esikoleni.
Bakwenze sengathi uma umzali engakwenzi lokho ngeke ulimi luthuthuthuke enganeni. Ufice izingane ezizalwa emindenini ekhuluma isinguni seziveteza isingisi emakhaya, zigcine zingasakwazi ukukhuluma nabanye abantu bomndeni.
Zizonde nolimi lwazo ngoba zikholwa wukuthi lunenkinga.
Lezi zinto uma zingaqhubeka kanje kuzogcina kushabalala izilimi zesinguni, obekungeyona inhloso yabazali noma umphakathi-jikelele,” kusho unkk Mdlalo.