‘Sizoba ngcono ngolwesithathu isimo sikagesi’
UNGQONGQOSHE wezikagesi, udkt Kgosientsho Ramokgopa, uveze ukuthi akulula ukuqeda inkinga yokunqamuka kukagesi njengoba kunezinkinga zengqalasizinda endala.
Kodwa uthe kunamathimba awazi kahle ugesi asebenza ngokuzikhandla.
Uveze nokuthi kulindeleke ukuthi sehle kakhulu isigaba sokucishwa kukagesi maphakathi nesonto wathi isizathu sokuthi ugesi uqale wanqanyulwa ngokwesigaba sesithupha, kodwa okugcine kwehlele kwesesihlanu yingoba kufe imishini eyisishiyagalolunye.
Uthe balindele ukuthi le mishini ibe isilungile ngolwesithathu.
“Ukufa kwale mishini kusho ukuthi silahlekelwe wugesi owu-4 400MW okuyikona okusifake esigabeni sesithupha sokunqamuka kukagesi. Imishini ifile ngenxa yokuvuza kwamashubhu ama-boiler ethu. Sithole nogesi omncane ezinhlelweni zokuwuphehla ngomoya nangelanga. Sinamathimba asebenzayo njengamanje ukulungisa le nkinga,” kusho uramokgopa.
Ubalule ukuthi ifa nje vele bekukhona eminye ebicinyiwe ukuze ilungiswe ngokohlelo olukhona lokulungisa imishini ingakazicimeli.
Uthe umengameli Cyril Ramaphosa ayikho into entsha ayishilo ngoba naye uhlale ebazisa abezindaba ukuthi isimo sizoshintsha, izophela inkinga yokunqamuka kukagesi.
Ubalule ukuthi ukunqamuka kukagesi ngokwesigaba sesithupha yinto ebingakaze yenzeke kusukela ngonovemba wonyaka odlule.
“Yebo sinazo izingqinamba kodwa sekuseduze ukuthi sibone umehluko. Ubunzima esibhekene nabo njengamanje buzodlula ngoba imishini yethu siyayikhanda. Isimo sizoba ngcono. Ngolwesithathu silindele ukuthi ubuye ugesi owu-4 400MW ongekho njengamanje lokhu kuzokwenza umehluko omkhulu,” kusho uramokgopa.
Emuva kwesithangami sikaramokgopa, i-eskom imemezele ukuthi ugesi usuzonqamuka ngokwesigaba sesihlanu kusukela ngo-12 emini ngoba sekunemishini esisebenza ebilungiswa.
Iningizimu
Afrika idinga ugesi owu-25 290MW ngezikhathi ezimatasa, okuvamise ukuthi kube yizikhathi zantambama.