Ibafana iqinise ithemba lokungena kweyendebe yomhlaba
UKUDLALA ngokuzimisela kwebafana Bafana kwi-africa Cup of Nations (Afcon) kubuyise ithemba ngokuthi ingase ingene emidlalweni yendebe yomhlaba elandelayo.
Yize luselude ukhalo kweyokuhlungela imidlalo ezokuba se-us, Canada nasemexico ngo-2026, kepha kunenhlansi yethemba ngokuthi ibafana ingangena kule midlalo. Ukuzinikela nesibindi sabadlali beqembu lesizwe eligcine lilale isithathu kwi-afcon kwenza abaningi babone lizobalwa namazwe angu-9 azomele i-afrika kweyomhlaba. Elakuleli lagcina ukugijima endebeni yomhlaba ngesikhathi lingosokhaya ngo-2010.
Iqembu lesizwe bese lilahlekelwe wukwesekwa nokwethenjwa ngenxa yokudlala kwalo ibhola elingajabulisi isikhathi eside. Zijikile izinto emidlalweni ebise-ivory Coast lidlala ibhola eliseqophelweni eliphezulu.
Ibafana iqale ukunakeka kwi-afcon ngesikhathi idlulela esigabeni somkhumulajezi eqoqweni ebelinamazwe anzima, okubalwa kuwo imali netunisia. Iphinde yagila izimanga ngesikhathi ithela othulini imorocco okuyizwe eliphezulu ngokwezilinganiso zokukleliswa kwamazwe e-afrika.
Abaningi bebesazitshela ukuthi ibafana ayishintshile ngesikhathi ihlulwa emdlalweni wokuvula nemali. Ivuke yazithatha yaze yayobhajwa kwi-semi final lapho ikhishwe khona yinigeria ngo 4-2 sekukhahlelwa amaphenathi.
Ukuzimisela okubonakale kwibafana ibhekene nenigeria, kwenza kungangabazeki ukuthi nasemidlalweni yokuhlungela indebe yomhlaba izokwenza kangcono. Iseqoqweni elilodwa nebenin, Lesotho, Rwanda nezimbabwe.
Kumele nakanjani umdlandla esiwubone kwi-afcon ube yisisekelo seqembu elizophendla indawo emidlalweni yendebe yomhlaba. Abadlali bakhombise ukuvuthwa nokubambisana kumele baqhubeke lapho bangavumi lutho oluzokuma endleleni yeqembu.