Umelaphi wendabuko okhethweni lokuchibiyela
UKHUTHAZWE ngamalungu omphakathi abewasiza ngezindlela ezahlukene ukuba angenele ukhetho lokuchibiyela laku-ward 11 enewcastle, oluzoba kusasa, umelaphi wendabuko wakule ndawo ophinde abe ngusomabhizinisi.
Umnuz Phumlani Dlamini, odume kakhulu ngelikamngcwabuyahlehla, uzongenela ukhetho lokuchibiyela ezimele okokuqala kusasa.
Le ward ngaphambilini ibikade isezandleni ZE-ANC.
Udlamini waziwa kakhulu ngezinhlelo zokuthuthukisa umphakathi ajwayele ukuba nazo kule ndawo.
"Ngithathe isinqumo sokuthi ngibahloniphe abantu uma bethi angilungenele ukhetho lokuba yikhansela lakule ndawo.''
Udlamini usanda kunikezela ngosizo lwezincwadi zokushayela kubantu abasha bakule ndawo abangu-100.
Minyaka yonke ngojanuwari unikezela ngemali yokubhalisela ukufunda emanyuvesi kubafundi abangu-50 bakule ndawo.
Ngonyaka owedlule unikezele ngosizo lwama-ambulensi amabili esikhungweni sabaphila nokukhubazeka sasenanda.
Imisebenzi yakhe aseyenzele umphakathi uthe ukholwa ukuthi yiyona kanye emkhulumelayo kubantu.
Ujwayele ukuba nemicimbi yokunikela ngamagilosa okudla kogogo nomkhulu.
"Ngiyazethemba kakhulu ukuthi kukhona okuhle okuzovela kulolu khetho.”
Uthembise ukuthi kuningi kakhulu okuhle angakwenzela umphakathi waku-ward 11 uma engathola ithuba lokuba yikhansela.
Uthe izinto abezenzela umphakathi ubezenza ngoba enothando olujulile lwabantu, hhayi ngoba ebehlose ukucathamela isikhundla esithile.
“Abantu yibona ababona ukuthi izinto zingaba ngcono kakhulu uma kungangena mina. Kodwa-ke ngiyathemba ukuthi njengoba benginxenxile, ngeke balenze iphutha lokungidumaza.”