Kuphazamiseke ukufunda isango likhiywe ngengidi engaziwa
AKUFUNDWANGA izolo esikoleni sakwanyuswa, isiyajabula High, othisha nabafundi befica isango livalwe ngengidi engaziwa.
Kusolwa ukuthi ingidi ifakwe ngezikhathi zasekuseni khona izolo, kungakafiki muntu esikoleni.
Eduze nesango bekunezicucu zamaphepha abhalwe ngomshini umusho owodwa othi: “Isikole sidinga uthishanhloko, sicela umnyango wezemfundo ungenelele kulolu daba”.
Kusolwa ukuthi abenze lokhu abazali osekunesikhathi bekhalaza ngokungabi bikho kukathishanhloko kulesi sikole.
Ngokuthola kwesolezwe, lesi sikole asinaye uthishanhloko kusuka ngojulayi nyakenye, kanti ibamba elikhona kuthiwa libuye linqindeke amandla, kube khona izinto elithi aligunyaziwe ukuzenza.
Kuthintwa osesigungwini esilawula isikole, umnuz Shweleza Majola, uvumile ukuthi uthishanhloko ubengakaqashwa kulandela ukuhamba kukalowo owayekhona maphakathi nonyaka odlule.
Uveze ukuthi sekukaningi bezitshela ukuthi uhlelo lokuqashwa kukathishanhloko seluyaqala kodwa lubuye lubambezeleke, umhloli eveza ukubambeka.
“Ngelinye ilanga sathi sesikhona esikoleni, sesilinde ukuthi uzoza nama-cv ukuze siwabuke sonke, waveza ukuthi ngeke eseza ngezizathu ezithile,” kusho umajola.
Uthe sebenokusola ukuthi mhlawumbe kukhona ofuna ukuphambanisa izinkomishi ekuqashweni kukathishanhloko.
“Mhlawumbe bafuna siludube lolu hlelo siyisigungu ukuze benze ngendlela yabo. Noma bachitha isikhathi ukuze kufike ukuphela kukamashi lapho okuzoshintshwa khona izigungu ezikhona njengamanje ezikoleni, sekungena ezintsha,” kuqhuba umajola.
Uthe yize bengenalwazi ngalowo noma labo abavale isikole kodwa nabo beyisigungu banomuzwa wokuthi isikole siyamdinga uthishanhloko oqashwe ngokugcwele.
Umnyango wezemfundo E-KZN awutholakalanga.