Kungani ungizwe engakhuzwa yize ehlisa isithunzi sethu?
MHLELI: Ngesikhathi ungizwe Mchunu esengumsakazi wokhozi FM, kuneminye iminyango kahulumeni wakwazulu-natal eyayisebenzisana naye njengenxusa lesifundazwe.
Bambalwa ababengaziqhenyi ngaye esifundazweni. Wayeligcokama lensizwa, enesisoka futhi ekhuluma into ephusile ngaso sonke isikhathi. Wawungeke umqhathanise nempilo aseyiphila manje. Kodwa muva nje, sekukuncane okusijabulisayo ngaye. Usematheni ngenxa yezinto azenzayo.
Usanda kumemezela ukuthi umholi WE-EFF uyongena enkundleni imoses Mabhida, efile yena. Inkulumo efana nale ayimane iqhamuke nje. Kusuke kukuningi ukuxokozela ekhanda nasenhliziyweni yalowo muntu. Ngesikhathi ngibhala lapha bengibuka i-video kangizwe lapho emema amabhinca ukuba aphelele ethekwini.
Kudingeka ukuthi indlunkulu yethu ingazithathi kancane ezinye izinto ezenziwa ungizwe nabanye. Iqiniso lithi baningana abantu abaziphathisa okwabantu abangaphethwe. Okunye abakwenzayo kucekela phansi isithunzi sobukhosi nesizwe samazulu jikelele.
Angazi noma yimina ngedwa yini owazi ukuthi umuntu wakwazulu-natal, kufanele ahloniphe ubukhosi nendlunkulu kazulu ngaso sonke isikhathi. Ezinye izinhlanga ziyasehlula thina ngoba konke esikwenzayo kuba sengathi asinangqondo. Siyihlaya kwezinye izifundazwe.
Ngesikhathi kukhotheme isilo ngo-2021, umsakazi wemetro FM ut-bo Touch wathi sizilile sonke, silahlekelwe yinkosi yethu sonke. Wathi ngaphambi kokuba sibe ngabapedi, Venda, Shangane, Xhosa, Sotho, singamazulu kuqala. Ngesikhathi kukhotheme inkosi yakwabuthelezi wathi: "Njengabantu abamnyama ake sithathe leli thuba sibungaze ukuba nomholi ohambe eseno-95 weminyaka ngesikhathi sethu.“Waqhuba wathi ekuhambeni kwesikhathi kuzofana nenganekwane ukuba nomuntu onale minyaka.
Inkulumo yomsakazi ikhombisa inhlonipho esiyithola kwezinye izizwe. Ngakho kuyadumaza ukuthi sibuye sibe nabantu abayiziphoxi njengongizwe, abanenhlese yokucwasa abanye abantu abamnyama baseningizimu Afrika. Umchunu usejwayele ukuphoxa futhi ehlise isithunzi sethu singamazulu kepha akekho umuntu omkhuzayo. Kumane kuthuleke kube sengathi uziphethe, akanamholi.
Yingoba enjani yena ngoba uziphatha ngendlela engasile kodwa akakhuzwa? Ngabe uyasatshwa? Njengoba ebememeza zonke izinkalo ethi amabhinca awaphelele ethekwini, uyini yena ngokwesikhundla lesi esimgunyaza ukubiza abantu besilo?
Akufanele sithi sihlonishwa kangaka ngabezinye izinhlanga kodwa siziphathise okwabantu abakhulela emaphandleni, kwazisholo umntwana wakwaphindangene.