Indumalo kwabesharks kulimala u-’elizabedi’
UKHATHAZEKILE ngokulimala kwabadlali umqeqeshi wehollywoodbets Sharks, ujohn Plumtree, njengoba leli qembu selilahlekelwe esinye sezilomo, u-eben “Elizabedi” Etzebeth.
Isharks ibheke ukuqhubeka nemidlalo ye-united Rugby Championship (URC) ngegiya elingcono kulandela ukushaya udaka ngaphambi kwekhefu kodwa igqemeke ingozi ngenxa yokuthi u-etzebeth usehlinzwe edolweni.
Lo mdlali ozandisele ugazi ngesikhathi amabhokobhoko evikela isicoco sendebe yomhlaba ngonyaka odlule ubengomunye wabadlali abangcono kwisharks kule sizini.
Selokhu I-URC iqalile ngo-okthoba, nyakenye, isharks ibilokhu inohlu olude lwabadlali abalimele yize ilindele ukuthi abanye babo abafana nobongi Mbonambi, Vincent Koch novincent Tshituka, babuye maduze.
“Yinde isizini futhi ngizwa sengathi sekusikhinyabeze kakhulu ukulimala kwabadlali. Ubongi uzodlala okokuqala kule sizini kodwa sonke siyazi ukuthi uyena i-hooker yethu ehamba phambili,” usho kanje uplumtree.
“U-etzebeth ubeseqalile ukudlala kodwa manje usehlinziwe futhi kuzothatha amasonto ukuthi abuye. Kungiphatha kabi ukuthi angikwazi ukudlalisa iqoqo labadlali baphambili engilifunayo. Ukuba ngiyakwazi ukwenza lokho besizokwazi ukufaka abadlali abanomfutho uma sekudlule imizuzu engu-60.”
Isharks, esanqobe umdlalo owodwa WE-URC kweyisishiyagalolunye kule sizini, izobhekana NEDHL Stormers ehollywoodbets Kings Park kusasa ngo-5.05 ntambama.
Into esalihambele kahle leli qembu kule sizini kube wukuqhwakela eqoqweni lalo kwichallenge Cup, lakwazi ukungena kwilast 16.
Ukaputeni ulukhanyo Am unethemba lokuthi sebezokwazi ukuletha ifomu enhle abanayo kulowo mqhudelwano kwi-urc.
“Ngeshwa asiqalanga kahle kwiligi
(URC), kodwa ngijabule ngezinga esikulona njengamanje. Ngicabanga ukuthi i-challenge
Cup ingasisiza ukuthuthukisa isizini yethu,” kusho u-am. Nakanjani likhona ithemba ngekusasa. Kukhona ukuthuthuka esikubonayo. Nasemidlalweni yeligi engasihambelanga kahle kukhona okuhle esikwenzile kodwa saphikwa yimiphumela.
Njengoba isharks isemsileni ngamaphuzu ayisishiyagalolunye emidlalweni eyisishiyagalolunye, istormers isendaweni yesikhombisa ngawu-26. Leli qembu lasekapa selinqobe imidlalo emihlanu kweyisishiyagalolunye eseliyidlalile.
Kuzoba nomunye umdlalo WE-URC phakathi kwamaqembu akuleli kule mpelasonto lapho i-emirates Lions izodudulana khona nevodacom Bulls e-ellis Park, egoli, kusasa ngo-3 ntambama. Ibulls isendaweni yesine kwi-log ngamaphuzu angu-30, kanti ilions ilele endaweni ka-10 ngamaphuzu angu-24.