Ngeke kusalindwa into engaziwa ngokwenyulwa kwempesheni
KUPHELILE ukuqagela nokulinda umnyama ongenafu kubasebenzi abafuna ukwenyula ingxenye yemali yempesheni yabo ngaphandle kokuthi baze basule emsebenzini noma bathathe umhlalaphansi.
Ungqongqoshe wezezimali umnuz Enoch Godongwana uqede ukuqagela nokulinda njengoba ememezele ukuthi le ngxenye yempesheni abasebenzi bazoqala ukuyithola ngosepthemba 1, 2024. Ukuveze lokhu ethula isabelomali salo nyaka ecity Hall ekapa izolo.
“Bengivelelwa lapho bengihamba khona abasebenzi bebengimisa babuze ukuthi bayithola nini ingxenye yemali yabo yempesheni bangaze basule emsebenzini. Omunye wothisha waze wangibuza ukuthi uzothola malini, ngamtshela ukuthi angazi. Batsheleni-ke ukuthi le ngxenye yemali yabo bazoyithola ngosepthemba kulo nyaka.”
Uthe sekwenziwe lukhulu ngaphansi kohlelo olwaziwa nge-two-pot retirement system.
“Izohlukaniswa imali ezofakwa, ingxenye izoya esikhwameni sokonga kuthi enye iye esikhwameni sempesheni ozokwazi ukuyithola uma usuthatha umhlalaphansi. Le ndlela iqinisekisa ukuthi iyavikelwa imali yabasebenzi ukuze baphile kahle uma sebethatha umhlalaphansi.”
Uthe bafuna ukulungisa nesimo senhlupheko kubasebenzi bakwazi ukuthatha ingxenye yemali yabo ukuze behlise umthwalo ngasemalini esikhathini esinzima.
Izinyunyana zabasebenzi zakhala ngokuhamba kancane kwalolu hlelo njengoba zazifuna lusheshe ukuze abasebenzi abadonsa kanzima bathole ingxenye yemali bakhokhele izikweletu.
Lezi zinyunyana zazikhala ngokuthi abasebenzi bafuna imali yokukhokhela izingane zabo ezikhungweni zemfundo ephakeme, abanye bafuna ukuqedela izikweletu zabo zemizi kanjalo nezimoto.
Umgcinimafa uveze ukuthi ofuna ukuthatha ingxenye yemali yakhe yempesheni uvumeleke ukuyithatha kanye ngonyaka. Imali encane angayithola isuka ku-r2 000.
Kulindeleke ukuthi kuqoqwe imali ebalelwa kur5 billion kulo nyakamali uma abasebenzi sebeqalile ukuthatha ingxenye yemali yabo ngaphansi kwalolu hlelo.
Umgcinimafa uphinde waxwayisa abantu ngokuthi bangayithathi imali yabo empeshenini singekho isidingo ngoba inhloso ngukuthi babe nemali uma sebethatha umhlalaphansi.