Kufunwa abasolwa ngokubamba inkunzi imoto yemali
KUFUNWA uthuli abasinde ngokulambisa amaphoyisa ethela othulini ababili abasolwa ngokubamba inkunzi imoto ethwala imali, okuthiwa bebedudulana nawo ngenhlamvu, esigamekweni esenzeke kwa-u emlaza ngolwesithathu ebusuku.
Kulesi sigameko kuthiwa abasolwa ababili kwabane abebesendlini baphunyukile babaleka ngesikhathi ozakwabo besala enkundleni kudutshulwana namaphoyisa, kanti owakhulumelayo esifundazweni, ucolonel Robert Netshiunda, uthe amaphoyisa asezithendeni zabo.
Unetshiunda uthe amaphoyisa ophiko loklebe esifundazweni, abelandela umkhondo ngabasolwa esigamekweni sokubamba inkunzi imoto ethwala imali esenzeke kwesinye sezitolo esiphingo, okuthiwa kukhonjwe kuso unogada ngezibhamu bashaqa isamba semali engadalulwanga bathatha nesibhamu sakhe somsebenzi.
“Uphenyo olunzulu lwamaphoyisa luholele emzini othile osemlaza lapho abasolwa ababili bebhadanywe amaphoyisa bengaphakathi kuwo. Abasolwa bavulele ngenhlamvu bebhekise emaphoyiseni, nawo aphendula kwafa ababili. Abanye abasolwa ababili babalekile, alikho iphoyisa elilimalile ngesikhathi kudutshulwana,” kusho unetshiunda.
Uthe kutholwe izibhamu ezimbili endaweni yesigameko. Kwenzeka lokhu nje, amaphoyisa akhuze umshubo kwesinye isehlo esifanayo etholene phezulu nabasolwa ngokubanjwa kwemoto ethwala imali nezinye izigameko zobugebengu. Kulesi sigameko esenzeke everulam ngomgqibelo, kufe abasolwa ababili. Kukholakala ukuthi bayingxenye yabawu-15 abazama ukubulala amaphoyisa ophiko lwetactical Response Team ngesikhathi kunomzamo ongaphumelelanga wokubamba inkunzi imoto ethwala imali enkandla ngo-2019.
Ngesikhathi ekhipha izibalo zobugebengu zekota yesine ngesonto eledlule, ungqongqoshe wezamaphoyisa umnuz Bheki Cele, uthe zingu-46 izigameko zokubanjwa inkunzi kwezimoto ezithwala imali kuleli ezenzeke phakathi kukaokthoba nodisemba nyakenye.