Koma amathe umfelokazi ezwa ngokubulawa komyeni
UPHELELWA wumunyu, avukwe wulaka umfelokazi uma kutheleka umphenyi wecala engazalele emzini wakhe. Uphekwa ngemibuzo eshubile umaya ngemva kokungcwaba umyeni wakhe ujoe Burkett, obulawe ngokudutshulwa ngesikhathi besepaki. Usolwa kanjena nje umaya, yingoba uyisosha ebelishayela izindiza zombutho wezempi e-melika.
Kuyaziwa ukuthi ungushayas’bhamu oqeqeshiwe. Encwadini ethi Fool me once, umbhali uharlan Corben, uxoxa ngemigiligwane eyenzeka ngemva kokubulawa kukajoe, ophuma emdenini wezimpunyela.
Umaya usala edidekile ngemva kokubukela i-nanny cam, okuyividiyo esiza abazali bakwazi ukubona konke okwenzakayo ngesikhathi umuntu egade ingane yabo. Kuthi uma umaya esabukela ividiyo abone umnyeni wakhe edlala nengane yakhe, ashaqeke ngoba uyazi ukuthi bamgcwabe ezinsukwini ezedlule. Iqala lapho inkathazo uma esebuza u-isabella, umzanyana wengane yakhe.
Ngakolunye uhlangothi amaphoyisa athola umkhondo wababulali bomyeni wakhe. Uyaduduzeka umaya ngoba umseshi ubesola yena ngenxa yokuthi kusetshenziswe izibhamu ezifana nezakhe
ngesikhathi kubulawa ujoe. Koma amathe kumaya uma umseshi emtshela ukuthi isibhamu esibulele ujoe yisona esasetshenziswa kubulawa udadewabo uclaire eminyakeni embalwa edlule.
Ngesikhathi kubulawa uclaire, umaya wayejutshwe ekuwait. Ngabe uzothemba bani?
UMDANSI ovelele uzibuza aziphendule ngobudlelwano bakhe nonina, nezinqumo ayemthathela zona. Yize ujulia Glass, esekhulile futhi eshadile
kepha uyabalisa ngezinto ezamphuthela ngenxa yokuhlonipha izinqumo zikanina ulillian, owayengaphikiswa. Konke kwenzeka ngemva kokushona kukanina.
Ujulia, ukhumbula isikhathi lapho unina emgqugquzela ukuthi asheshe ashade ngemva nje, kokuqeda ukufunda enyuvesi. Ubalisa ngokuphoqwa ngunina ukuthi anciphise umzimba, waze washiya phansi ukudansa, i-ballet.
Yonke imicabango ibuya ilandelana futhi yenza amzonde unina futhi ayimnikezi ukuthula emphefumulweni wakhe. Yize ujulia enosizi futhi emkhumbula ulillain kepha ufisa sengathi ngabe akamphoqanga ukuthi ashade esemncane futhi ayeke ukudansa.
Ulisa Lazarus, ngumbhali wencwadi ethi Flight of the
dancer, ulandisa ngezinselelo zobudlelwano phakathi kukamama nendodakazi. Kuvamisile ukuthi omama balawule amantombazane bafune ukuthi bafeze amaphupho ngamadodakazi abo.
INCWADI: Ribbons of love UMBHALI:DKT Elizabeth Peter-ross ABASHICILELI: Healing Prayer Press
ZININGI izinhlelo zokuzithokozisa nokugubha izinsuku ezibalulekile empilweni yethu nezithandwa zethu. Enyangeni eqhakambisa uthando ufebhuwari, kunezincwadi ezimnandi eziqhakambisa uthando. Enye ithi Ribbons of love, ibhalwe ngudkt
Elizabeth Peter-ross. Ichaza kabanzi ngezimo zothando esizithakaselayo empilweni futhi esizithatha njengezibusiso. Yeluleka ngezivumelwano ezithathwa ngabantu abaganene. Umbhali uchaza ngomsuka wesigaba ngasinye esivamise ukuthakaselwa ngabantu abashadile. Abanye bathokozela ukuzalwa kwengane, ukuqeda iminyaka ethile beshadile nezinsuku ezibalulekile ebantwini abaganene. Incwadi ifundeka kakula futhi ineziyalo ezichaza ngezibusiso zokugubha izinsuku ezithize empilweni yabashadile.