Owebay uyibona isazomangaza abaningi
UGCWELE ukuzethemba umqeqeshi werichards Bay FC, uvusumuzi “Kanu” Vilakazi, njengoba ekholwa wukuthi leli qembu lisazojika izinto phezu kokuba lisadonsa kanzima kwidstv Premiership selokhu kuqale le sizini.
Irichards Bay izotholana phezulu nepolokwane City emdlalweni wenedbank Cup Last 32, eking Zwelithini Stadium, emlaza, kusasa ngo-6 ntambama.
Ezikavilakazi ziza kulo mdlalo zibuya esibhaxwini sika 3-1 ezisithole kwisekhukhune United kowedstv Premiership ngempelasonto edlule.
Zithola le nduku zisendaweni embi kwi-log yepremiership njengoba zihleli kunombolo-15 okuyisishozi sezembe.
“Lona ngumdlalo esizimisele ngokuwunqoba kumnyama kubomvu ukuze sikwazi ukubuyisa umgqigqo wethu.
Ngeke sizithele ngabandayo emdlaweni onjengalona wenedbank Cup ngoba sithi sibeka phambili imidlalo yeligi njengoba sisendaweni embi njengamanje kwi-log. Yonke imidlalo siyithatha njengebalulekile kungakhathaleki ukuthi eyomkhumulajezi noma eyeligi. Sizimisele ngokukusebenzisa ukuthi lo mdlalo sizobe siwudlalela ekhaya phambi kwabalandeli bethu,” kusho uvilakazi.
Uvilakazi uthathe izintambo ekuqeqesheni ibay ekupheleni kukadisemba ngemuva kokukhonjwa indlela kukakaitano Tembo.
Ngaphambi kokuthi kuyiwe ekhefini le-africa Cup of Nations (Afcon), leli qembu libhaxabule isupersport United ngo 3-1 koweligi.
Lowo bekuwumdlalo wokuqala kavilakazi ehlezi ebhentshini.
Irich Boyz phezu kokuba isadonsa kanzima emidlalweni yeligi, ikwazile ukufinyelela kowandulela owamanqamu wecarling Black Label Knockout, nakwinedbank uvilakazi unethemba lokuthi bangahamba ibanga elide.
“Leli qembu likhombisa okukhulu ukuhlangana futhi ingihlaba umxhwele indlela esidlala ngayo muva nje.
“Yize isishayile isekhukhune (ngeledlule) kodwa sidlale kahle kuloya mdlalo. Kuyishwa nje ukuthi abantu abawubonanga ngoba bewungavezwa kwithelevishini.
“Engifisa ukukusho wukuthi leli qembu lisazomangaza abaningi, niyobuza ningiphale ulimi,” kusho uvilakazi ekhuluma nezintatheli kuleli sonto.