Kubungazwe abenze kahle behola isibonelelo se-sassa
UNGQONGQOSHE wezokuthuthukiswa komphakathi, unkk Lindiwe Zulu, uthi asikho isidingo sokuthi abazali bakhathazeke ngemali yokufunda uma izingane ebezihola isibonelelo sikahulumeni seziphase u-matric.
Uthe izingane ziba sohlwini lokuthola uxhaso kwi-national Student Financial Aid Scheme (NSFAS) njengoba uhulumeni esuke azi ukuthi zivela emindenini eswele.
Ngolwesihlanu unkk
Zulu, iphini likangqongqoshe wezempilo udkt Sibongiseni Dhlomo nomphathiswa wezemfundo Kwazulunatal unkk Mbali Frazer, bebehalalisela izingane ebezihola isibonelelo sikahulumeni ezenze kahle ku-matric.
Unkk Zulu utshele abazali ukuthi uhulumeni akafuni kube nezingane ezingakwazi ukuqhuba imfundo yazo uma seziphothule u-matric.
“Uhulumeni uyalwazi usizi lwabazali abangenayo imali, yingakho athatha isinqumo sokuthi izingane ezihola izibonelelo zixhaswe uma seziya emabangeni emfundo ephakeme. Isibonelelo sazo ngeke sinqamuke, zizoqhubeka nokubonelelwa wuhulumeni zize ziphothule izifundo zazo,” kusho unkk Zulu.
Unkk Thamo Mzobe ophethe i-south African Social Security
Agency (Sassa) Kwazulu-natal, ubonge abafundi abenze kahle ku-matric nabazali babo.
Uthe laba bafundi nabazali bebeya kwa-sassa uma bebizwa ukuze kubhekwe ukuthi basaqhuba kahle yini esikoleni.
Unkanyezi Maphumulo
(18) obefunda elamontville
High, uthe usefunda enyuvesi yasezululand lapho enza khona iziqu kwezomthetho.
Ubonge i-sassa ngokubenzela umcimbi wokubahalalisela, esho ukuthi emakhaya abo beyingekho imali yokubabungaza ngokuphasa kahle.
Ugqugquzele abanye abafundi abahola izibonelelo zikahulumeni ukuba bazimisele esikoleni, wathi uma sebeqedile uhulumeni uyaqhubeka ngokubaxhasa NGE-NSFAS ukuze baqhubeke nezifundo zabo. Unina kankanyezi, unksz Ayanda Maphumulo, uthe uyaziqhenya kakhulu ngendodakazi yakhe, wabonga i-sassa ngokuhamba nabo yonke le ndlela njengabazali abangenayo imali.
Omunye umzali, unksz Nomfundo Nduli, uthe ingane yakhe yaqala ukuhola isibonelelo sikahulumeni ineminyaka emine kwaze kwaba iqeda u-matric.
Ugqugquzele abazali ukuthi babambisane nabasebenzi bakwa-sassa ngokuthi baye emihlanganweni abasuke bebizwa kuyo, waphetha ngokuthi kubalulekile ukweseka ingane, uyinike nothando ukuze izokwazi ukwenza kangcono.