Kubhekwe I-IEC nomhlahlandlela ozolandelwa okhethweni
NJENGOBA selufakwe ngaphansi komqulu kahulumeni usuku lokhetho umeyi 29, 2024, umengameli Cyril Ramaphosa unxuse abantu bakuleli ukuthi baphume ngobuningi babo bayovota.
Ukufakwa ngaphansi komqulu kwalolu suku kusho ukuthi kuzobe kuyiholidi elisemthethweni kuleli.
Okhulumela uramaphosa, umnuz Vincent Magwenya, uthe osekusele wukuthi abantu baphume ngobuningi babo bayovota.
Uthe ngaphandle kokuvota, ukhetho oluzayo kuzobe kuyisikhathi sokuthi kugujwe iminyaka engu-30 kwatholakala inkululeko kuleli.
“Umengameli unxuse abantu ukuthi baphume ngothi lwabo bavote. Abazokhankasa banxuswa ukuthi bakwenze lokhu ngokuthula, balandele imithetho yezwe.”
Ikhomishini eyengamele ukhetho kuleli i-independent Electoral Commission (IEC), kulindeleke ukuthi imemezele izinhlelo zokhetho njengoba usuku seluqoshwe ngaphansi komqulu kahulumeni.
Ikhomishini izokwenza lokhu esithangamini nabezindaba namhlanje egoli.
Okulindelekile ngukuthi iveze umhlahlandlela ozolandelwa kuze kufike usuku lokuvota.
Izophefumula ngezithinta imali okumele ikhokhwe ukuze ungenele ukhetho kanjalo nomnqamulajuqu kulabo abazongenela ukhetho.
Izokhuluma ngabahlala kwamanye amazwe abazovota, ukuvulwa kwezicelo zalabo abazovota ngokuyisipesheli njengoba kulolu khetho uzovota lapho uhlala khona kuphela noma kuwukhetho lukazwelonke nolwezifundazwe ngaphandle uma wenze izinhlelo kusenesikhathi nekhomishini.
Kuzomenyezelwa nesibalo samavoti adingekayo ukuze uthole isihlalo esishayamthetho noma ephalamende likazwelonke.
Amaqembu amaningi alubheke ngabomvu lolu khetho njengoba ethi kuzobe kufana nokhetho lokuqala lwentando yabantu ngo1994.
Kuzokhumbuleka ukuthi kuzobe kungokokuqala ukuthi abangenele ukhetho ngokuzimela babe yingxenye yokhetho njengoba bebengenela kuphela olohulumeni basekhaya.