Sinesibopho sokwenza ngokwemiyalelo yedlozi eliphila emizimbeni yethu
CISHE ungomunye wabantu osekufanele ngabe uyazibuza ukuthi kungani izinto zakho zingalungi yize usuphume wangena kubathandazi, abelaphi abanhlobonhlobo nabazibiza ngababholofida ezinkonzweni nabefundisi.
Umthandazo nawo awusali ngaphandle ngoba uyakhuleka kanti nasesontweni uyaya kodwa konke kumnyama njengobusuku kade kunonyezi. Iningi ligcina selikugxeka kodwa ekukugxekeni kwalo lingabheki ukuthi ngubani ngempela okufanele ngabe uyagxekwa. Kungabe uwena okufanele ukuba azigxeke noma yilabo osuke usuhambe kubona na?
Baningi namhlanje abayabhuzela ngamabhayi ezitaladini izimpelasonto zonke, kukhishwe amathwasa kuphothulwe, emigidini kudliwe inyama kuphuzwe iziphuzo ezidakayo nezibandayo, abanye baziveze ezinkundleni zokuxhumana kuthwasiswanwa. Ekugcineni uma sekuthwasiwe sekuyovelwa nezevatho nezinduku kumiwe, kokunye kukhulekwa emifuleni nasezimpophomeni.
Kufanele sizibuze ukuthi kwenzeka konke lokhu ingoba konakelephi ngempela?
Uma ubuyela emuva ubheka okwakwenzeka kuqala, uzothola ukuthi konke kwakususwa yithongo elalithumela umuntu ukuba ayongena emzimbeni womuntu ukuze afeze umsebenzi walo, lowo muntu okugcina kuthiwa yidlozi ngoba ungena kulo mzimba ngokudlozomela okwehlukile.
Kukhona okwakumgulisa ukungenwa yidlozi, amazwi akhulume komunye ukuthi wena awulaleli omunye aphuphe imifula, uyovuka ebusuku omunye abaleke njalo aze ayongena kutatalagu wesiziba, kokunye emzini womuntu lapho afike eselindelwe ukuba enzelwe athunywe khona yidlozi elimungenayo.
Nebala kuyokwenziwa njalo, akukho okungale okwakwenziwa kungashiwongo futhi kwakungekho nakubukisa emphakathini ngalokho.
Inkinga enkulu namhlanje osekuyiyona eyenza uzithole ungalapheki ndawo nosizo ungasalutholi, ingoba sekusebenza amathongo namadlozi amabili. Kukhona ithongo nedlozi okungabantu asebahamba emhlabeni bese kuba khona amathongo namadlozi ayithina esiphilayo kulo mhlaba.
Namhlanje sesiyefana nabantu asebadlula emhlabeni, abanye bethu esibabiza ngamadimoni sikholwe uma sithi bangamadimoni kusho ukuthi kwathina singamadimoni. Amadimoni amakhulu yithina ngoba yithina esiphuma singena sikhuleka sithi siyelapha kokunye siyazelapha kodwa sibe sicwile ezinkingeni esizazi thina sodwa, ngoba zingabonwa abanye, bese sidweba isithombe esiyingcwele ngaphandle lapho sihamba khona.
Kulula-ke ukuba umuntu namhlanje ahlangane nomuntu amtshele ukuthi kufanele enzeni, kumbe ubonani kuyena, omunye athi ngiyakubholofidela, nebala ukwenze lokho kodwa ukhohlwe ukuthi konke lokho ukutshelwa ngumuntu ophila njengawe emhlabeni.
Ukubona okungale kusemandleni avela kulabo abangasekho ngokusebenzisa umzimba onguwena, okungashiwo ukuthi uma sebengene kuwena bazibonisa ngomsebenzi wabo ugcwale imifula nezimpophoma, uthithibele nezivatho nezinsimbi zamathusi kodwa abasuke bekuthume khona ukuphilisa abantu ngabo, hhayi ngawe.
Namhlanje-ke izangoma ezinkulu nabathandazi abakhulu nabelaphi sekuyithongo nedlozi eliphilayo, hhayi labo asebadlula emhlabeni. Kungakho-ke nje kugcina konke kushaya wena othi ufuna usizo ngoba awusazi uzoluthola kubani, uthathe kuphi uyeke kuphi.
Amathongo namadlozi engikhuluma ngawo ngabantu abathi bethwasile abanye bezibiza ngabaphrofethi bahambe betshela umuntu ezihambela kumbe egibele etekisini noma esitimeleni ukuthi kuwena ngibona ukuthi nokuthi. Okuxakayo ukuthi bakubona nje lokho kuloyo muntu okwabo bakutshelwa ngubani? Inkinga enkulu thina esihambe siyitshela abantu ezindleleni yithina kakhulu, sikakwe yizinkinga.
Ngesinye isikhathi kubuye kuvele nasezinkonzweni umuntu athi: “Ngatshelwa enkonzweni ukuthi nginabadala kufanele ngithwase ngokwasenkonzweni”. Ukuthwasa ngikwazi kukunye, kushiwo ngumnikazi lowo osuke efuna athathelwe umsebenzi okulidlozi elithunywe yithongo ngokufuna ukusebenzisa umzimba elivela kuwona ngendlela yalo, hhayi ngendlela yomuntu.
Kukhona konke ukudideka, kufanele wazi impilo yakho ukuthi iphethwe ngubani. Namhlanje sekulula sithathe impilo yethu iphathwe ngabantu abakhuluma emisakazweni nakomathelevishini nasezinkundleni zokuxhumana.
Kuhle ukulalela lokho kodwa kufanele njalo uhlale uhlunga okuyikhona nokungekhona.
Kulula namhlanje ukuthatha umuntu othwasile ongazi lutho ngesintu nozalelwe elokishini noma esikompulazi, umthole kunguyena ohamba phambili ethi kunabantu abadlala ngabantu. Ukusho lokhu, hhayi ngoba eneqiniso kodwa ukuthi ulangazelele imali nokuqoqa abangani nodumo.
Ukwelapha kwanamhlanje sekufanele kuwele phansi kwezinsika ezithize: Ukucubungula kabanzi lapho uthi uyofuna khona usizo nolwazi lwesintu lwalowo muntu othi uyofuna kuyena usizo. Okufanele sikwazi namhlanje ukuthi kugijinyiswa ukubukwa nokubukisa ezinkundleni zokuxhumana kunokuba kulalelwe ithongo lomuntu ukuthi lithi yini okufanele asizwe ngayo bese esizwa njengalokhu idlozi lakhe liyalela.
Kungakho-ke namhlanje sinezinhlobo ezinhlanu zabantu abakhona; abantu abangasizakali ndawo ngenxa yenyovanyovane ekhona, abathwasile asebathwase ngaphezulu kokukodwa (ukhumbule umuntu uthwasa kanye), abathwasile abangazi basebenza ngayiphi impande, abalahliswe yizinyanga ngabatshelwa khona bethwasa okokuqala ekugcineni balalela ogobela ngoba efuna imali, abahlale betshela izinyanga zezinkundla zokuxhumana ngabakwenzayo okungukuphambana nomsebenzi wethongo nedlozi. Ekugcineni lokhu kwakha umbango phakathi kwedlozi nethongo okungabangasekho, namadlozi namathongo ayithina esiphilayo esihambe sibhulela abantu ezidlangalaleni.