Umkhonto usezithendeni zeda- ucwaningo

IQEMBU elikhankaselwa owayengumengameli, umnuz Jacob Zuma, umkhonto wesizwe, lisezithendeni zenhlangano ephikisa ngokusemthethweni IDA. Ucwaningo lwangaphakathi kwida lukhombisa ukuthi IMK iyiqembu lesithathu ngobukhulu. Lokhu kuvezwe ngumholi weda, umnuz John Steenhuisen, ngesikhathi enengxoxo NESABC. Kule ngxoxo usteenhuisen uphinde waveza ukuthi bangasebenzisana nemk uma kuwukuthi imigomo yabo iyefana. Usteenhuisen uchithe ucwaningo lwenhlangano, i-ipsos, olukhombisa ukuthi bazophunyukwa ukuba yiqembu lesibili ngobukhulu. Ucwaningo lwe-ipsos lukhombisa ukuthi I-EFF iyona ezokuba yiqembu eliphikisa ngokusemthethweni emva kokhetho oluzayo. Kepha usteenhuisen uthe ucwaningo lwabo lukhombisa ukuthi I-EFF iyona ezolahlekelwa kakhulu okhethweni lwangomeyi. Uthe ucwaningo lwabo luveza ukuthi IMK izothola amavoti angaphezu kwalawo azotholwa I-EFF okhethweni lwangomeyi. Ngokhetho olwedlule I-EFF iyona eyalala isithathu ngamavoti, ilandela ida.“umalema (ujulius) kuyobe unenhlanhla uma bebe yiqembu lesine ngobukhulu.” Usteenhuisen uthe abakugqizi qakala lokhu okutholwe wucwaningo lwe-ipsos. “Bahlezi begeja labo. Okhethweni olwedlule bathi sizothola u-14% wamavoti, sagcina sithola u-21%. Empeleni kufanele sijabule uma bethi sizokwehla ngoba kusho ukuthi sizophinde senze kahle.” Usteenhuisen uthe bangasebenzisana nemk uma kuwukuthi imigomo yabo iyahambisana. “Indaba yokubusa ngokubambisana ayikho lula. Singakwazi ukusebenzisana namaqembu anemigomo efanayo nowethu. Le nto sayibona kahle ngesikhathi sibambisene NE-EFF. Kwaba nezinkinga eziningi ngenxa yokuthi imigomo yethu ayifani. “Angikayiboni imigomo yemk. Uma kuwukuthi bakhuluma lezi zinto ezihlezi zishiwo nguzuma, angeke sisebenzisane nabo. Iqiniso ukuthi asikholelwa kulezo zinto. Uma bengayeka izinto ezihlezi zishiwo wuzuma, zokuthathwa komhlaba ngaphandle kwesinxephezelo, singasebenzisana nabo.” Usteenhuisen uthe ngeke basebenzisane NE-ANC NE-EFF, wathi imigomo yabo ayifani. Umhlaziyi wezepolitiki waseuniversity of Kwazulu-natal, umnuz Zakhele Ndlovu, uthe imiphumela yocwaningo lwangaphakathi kwida ayithusi. “Uzuma uyathandwa kakhulu kanti futhi kunabantu abaningi abadinelwe I-ANC. Bonke abantu abadinelwe I-ANC baya kwimk. I-EFF yona isifike ekugcineni, ayisakhuli, ikakhulukazi lapha Kwazulu-natal.” Undlovu uthe akaboni IDA isebenzisana nemk emva kokhetho. “Uma ubheka izinto abazikhuluma kwimk ziqhelelene kakhulu neda. Uma ubuka abantu abajoyina IMK, abantu abangahambisani neda.”