Ikhomba indlela ibuye ijike I-ANC ngabaya ephalamende
KUBUKEKA inhlangano ebusayo, I-ANC iyishaya emuva naphambili ngabaholi abasolwa ngobugwegwe. Njengoba ngolwesihlanu bekuwusuku lokugcina lokunikwa kwe-iec uhlu lwabaholi abazoyimela okhethweni, kuvele namagama abaholi abachaphazelwa yimibiko ngokungahambisi ngendlela.
I-ANC izithethelele ngokuthi abangu-31 baya empeshenini nokushiye kunezikhala ezivulekile. Phakathi kwabo, kukhona udkt Nkosazana Dlamini Zuma, Mnuz Pravin Gordhan nonkk Naledi Pandor, abamemezele ukuthi kabasabuyeli ephalamende. Yize abanye benindwe yimibiko ngenkohlakalo kodwa bavivinywe ngaphakathi base begunyazwa ukungena ohlwini. Labo ngomengameli Cyril Ramaphosa ngodaba lwasephala Phala, Mnuz Gwede Mantashe ongusihlalo WE-ANC, Dkt Zweli Mkhize, nomnu Thabang Makwetla. Umkhize kuthiwe umsulwa odabeni lwedigital Vibes olwaba ngundabamlonyeni esengungqongqoshe wezempilo.
Omantashe nomakwetla bekushaywa amakhala ngabo ngodaba lwebosasa. Abanye abaholi okuthiwa bavele phambi kwekomiti lezobuqotho bakhululwa ukumela iqembu ngomnuz Paul Mashatile iphini likamengameli, ungqongqoshe wezezimali umnuz Enoch Godongwana, usihlalo we-eastern Cape u-oscar Mabuyane, usotswebhu WE-ANC unkk Pemmy Majodina, undunankulu wasempumalanga urefilwe Mtsweni-tsipane nongqongqoshe ehhovisi likamengameli unkk Khumbudzo Ntshavheni. Kuthiwa ikomiti lishaye amakhala ngomnuz Malusi Gigaba, David Mahlobo, Zizi Kodwa nocedric Frolick kodwa abafakiwe kwabazomela inhlangano ephalamende.
Lokhu kusho ukuthi I-ANC iphikisana nekomiti lezobuqotho. Kuthiwe kugunyazwe ukuba kufakwe amagama abo ukuze inhlangano ingahlukani phakathi. NASEKZN kunabaholi abebeshenxisiwe ngoba besahamba amacala, kodwa asebesetshenziswa ukukhankasa. Lokhu kuhumusheka ngokuthi I-ANC ibeka phambili ubumbano lwayo, ayinendaba nokuthi lwakhelwa phezu kwamabibi.