Umasipala wetheku nohlelo lokubuyisela isimo kwesejwayelekile
KUZOTHATHA amasonto amabili ukuthi ukuqoqwa kukadoti kubuyele esimeni ethekwini. Lokhu kushiwo imeya yetheku umnuz Mxolisi Kaunda izolo esithangamini nabezindaba sokwazisa umphakathi ngokuthi umkhandlu usukuphi nezinhlelo zawo zokubuyisela isimo kwesejwayelekile, emva kokuphazamiseka kokuhanjiswa kwezidingo ngenxa yesiteleka sabasebenzi benyunyana ISA Municipal Workers Union (Samwu).
Ukaunda uthe nakuba seluqalile uhlelo lokuthi kubuyiselwe isimo kwesejwayelekile kunezindawo eziningi abasebenzi bakamasipala abangakakwazi ukufinyelela kuzo okubalwa izindawo ezifana nasedube Village, Maoti, Clermont, Westham, Westmead, Morningside nakwandengezi nezinye. Uthe umkhankaso wokuhlanza enkabeni yedolobha uzoqala namhlanje kuzobe kunamavolontiya angaphezulu kuka-3 000 azobe eyingxenye yokuqoqwa kukadoti enkabeni yedolobha.
Mayelana nokubuyiselwa kohlelo lwamanzi, uthe umasipala uyawuthumelela umphakathi amanzi ngamaloli kodwa baqale ngokuthi amanzi athunyelwe ezikoleni nasezikhungweni zezempilo.
Uthe umasipala uhlangene nenyunyana ngesikhalo sayo sokuthi abasebenzi bafuna ukuthi iholo labo lilingane neliholwa ngabanye ozakwabo komasipala abakhulu kodwa wathi asikho isivumelwano abafinyelele kuso nabangafinyelela kuso ngoba lolu daba lusingethwe ezingeni likazwelonke.
Uthe ngakolunye uhlangothi bayaqhubeka nokuqondisa ubugwegwe abasebenzi abephule umthetho ngokuba ingxenye yalesi siteleka esingekho emthethweni.
"Bangu-81 abasebenzi abamisiwe ngenxa yokwephula umthetho, abangu-88 baxoshiwe, abangaphezulu kuka-1 800 banikezwe izincwadi zokungaziphathi kahle, abangu-13 baboshiwe.
Imenenja kamasipala wetheku umnuz Musa Mbhele, ibuzwa ukuthi kungani bebe nezingxoxo nenyunyana ekubeni bethi isiteleka asikho emthethweni futhi nodaba ekhuluma ngalo kumele ludingidwe ezingeni likazwelonke, ithe basengabasebenzi babo kubalulekile ukuthi bakhulume nabo futhi awukho umthetho othi akumele bakhulume nabo ngoba bazibandakanye nesiteleka esingekho emthethweni.
Uthe umasipala uzowaxegisela isikweletu amakhasimende azihambisele udoti lapho ulahlwa khona kodwa ngeke akwazi ukusho ukuthi ngamalini ngoba kunezinto ezihlanganiswayo emalini yokulandwa kwemfucuza kuyo okubalwa eyendawo okulahlwa kuyo, ukugadwa kwayo nokunye.
Ukaunda uthe uyakuqonda ukukhathazeka komphakathi kodwa uyawunxusa ukuthi unciphise imibhikisho ukuze abasebenzi bezokwazi ukungena ezindaweni zawo bezolungisa.
Ukaunda uxolisile ngokungazitholi izidingo wathi bayasilungisa isimo.
Lishone elayizolo kwezinye izindawo ebezikade zingenawo ugesi usubuyile.
Ehostela Kwamashu ugesi wahamba ngesonto izolo ubuyile, ehostela ethokoza bese kungenela esontweni lesibili ugesi ungekho izolo ubuyile, e-adams nakhona ubusuhambe amasonto amabili izolo ubuyile, Kwandengezi izakhamuzi zithe ugesi namanzi sekubuyile, ugesi ubuhambe ngesonto. Kwezinye izingxenye zakwamashu, Maoti nasedube Village amanzi sekuphele amasonto amabili engekho awakabuyi kulezi zindawo nogesi awukho.