Kuchithiwe ukuqashwa ngokugcwele konogada ethekwini
AMAKHANSELA kamasipala wasethekwini, anukane ngenkohlakalo ngenkathi kuchithwa isiphakamiso sokuthi baqashwe ngokugcwele onogada nabasebenzi abahlanza izakhiwo zomkhandlu.
Amakhansela avotele ukuthi kuchithwe isiphakamiso, asolwe ngokuvikela izinkampani ezihlomula ngamathenda okuqapha nokuhlanza izakhiwo zomkhandlu.
Lokhu kwenzeke emhlanganweni womkhandlu izolo.
Umhlangano ulalele umbiko wethimba ebeliphenya ukuthi umasipala ungakwazi yini ukuqasha ngokugcwele onogada nabahlanzayo. Umbiko uthe umasipala awunayo imali eyanele ukuthi uqashe ngokuphelele bonke abasebenzi.
Umbiko uxwayise ngokuthi uma bonke abasebenzi bengaqashwa ngokugcwele ngeke besawasebenza amahora amade futhi kungaba nemibhikisho.
Iningi lamakhansela E-ANC,
DA namaqembu amancane, avotele ukuthi umbiko uchithwe.
Lokhu kucasule amakhansela E-IFP ne-actionsa, asole amakhansela E-ANC neda ngokuhlanganyela onogada. Isiphakamiso sokuthi onogada baqashwe ngokugcwele sasifakwe yikhansela le-actionsa, umnuz Zwakele Mncwango.
Umncwango uthe ukuchithwa kwesiphakamiso kusho ukuthi izinkampani ezithola amathenda zizoqhubeka nokudlala ngabasebenzi.
“Sinenkinga entsha lapha ethekwini. Inkinga entsha YI-ANC neda abahlangene ngabasebenzi.”
Umncwango uthe okuxakayo ukuthi ucwaningo luthole ukuthi izinkampani ezithola amathenda ziyahluleka ukwenza ngendlela efanele umsebenzi ezisuke ziwunikiwe.
Ikhansela LE-IFP, umnuz
Mzwethu Gwala, lithe ukuchithwa kwesiphakamiso kukhombisa ukuthi kukhona abaholi bomkhandlu abahlomulayo ezinkampanini ezithola amathenda.
“Umbhedo le nto eshiwo umasipala yokuthi ngeke ukwazi ukuqasha ngokugcwele onogada nabahlanzayo. Kusho ukuthi kukhona abavikela izinkampani ezithola amathenda,” kusho ugwala.
Imeya umxolisi Kaunda, ithe ukuqashwa ngokugcwele kwabaqaphi kwafaka umasipala wasejohannesburg ngaphansi kwezinkinga eziningi, wathi abafuni ukuzithola besenkingeni efanayo.
“Asifuni ukwenza into ebingaqumba phansi umasipala.
“Ukuqasha ngokugcwele bonke abasebenzi bekuzosho ukuthi imali eningi ibizogcina isiya ekuholeleni abasebenzi. Lokhu kusho ukuthi ibizokuba ncane imali yokwenza izidingo,” kuchaza ukaunda.
Uthe bazoqhamuka nohlelo lokuqeqesha amaqoqo onogada nabahlanzayo, babalekelele ekutheni bavule izinkampani zabo ezizonikezwa umsebenzi.
Ikhansela leda, umnuz Thabani Mthethwa, lisole umncwango ngokukhankasa ngosizi lonogada nabasebenzi abahlanza izakhiwo.
Umthethwa uthe umncwango uyazi ukuthi umasipala awunayo imali eyanele ukuthi uqashe bonke abasebenzi ngokugcwele.