Bathintwa usizi lwabantu abemisakazo abalula isandla
UKUHLALE belalela usizi lwabantu ngezindlela ezehlukene emisakazweni abayisebenzelayo, sekwenze abasakazi besifazane basungula izinhlangano abahlose ngazo ukuqokelela imali yokuphonsa esivivaneni osizini olukhungethe abantu.
Umsakazi wokhozi FM, uzeal Dladla, ungomunye wabo njengoba asungula imadladla Makandabe Foundation okumanje inomjikelezo ezikoleni inikela ngezinsiza ezehlukene okubalwa kuzo imifaniswano nokunye. Uzeal wasungula le nhlangano ngo2021. Noma engalutholi uxhaso lwemali kodwa uyaqinisekisa ukuthi kukhona akulondoloza emholweni wakhe ukuze enze umsebenzi wokunikela kulabo bafundi abadla imbuya ngothi.
"Kulo nyaka ngibe nenhlanhla yoxhaso lwenkampani yezimoto inissan engilekelele ukuhambisa imifaniswano ezikoleni. Nabantu engisondelene nabo ngokubona isidingo nokubaluleka kwemfundo, bafake isandla sakwazi ukusiza izingane eziningi kulo nyaka. Isifiso sami ukukhula ngikwazi ukufinyelela nakwezinye izindawo," kusho uzeal.
Ngaphandle kwakhe, intandokazi yomsakazo ivuma FM, ujacinta Ngobese, selokhu aqala ukunikela esemsakazweni womphakathi ivibe FM wadlulela kwigagasi FM njengoba esanikela namanje. Ngo-2016 waqinisa umkhankaso wokunikelela ngamaqakelo nosekukhuthaze abaningi okubalwa nabesilisa.
Inhlangano yakhe ayigcini nje ngamaqakelo kodwa iyanikela ngemifaniswano yesikole, ukudla, izimpahla zokugqoka, ifundise nabanye abafundi iphinde asize ngosizo longoti abehlukene emindenini enezinkinga ezingaxazululeki.
Uslindile Zungu wevibe FM wemancane Foundation ayisungula ngo-2021, unikelela abafundi ngezicathulo zesikole ezingaphezulu kuka-300 namaqakelo.
Imancane
Foundation igxile kakhulu ezikoleni zasemakhaya endwedwe nasemalokishini akhele itheku.
"Ngesikhathi secovid-19 ngabona intsha iphelelwa umsebenzi futhi iningi lihleli emakhaya no-matric ongaba usizo. Ngaqala nohlelo lokusebenzisana nezinhlangano eziqukethe ulwazi lwezemfundo ukusiza abangafundi bakwazi ukuthola ulwazi nezindawo zokufunda. Izikole zasemakhaya yizona ezisalele kakhulu nokwenza ngigxile kuzo," kusho uslindile.
Uzamangwane Khanyile wesiteshi somphakathi Izwi Lomzansi FM, unomkhankaso ipad Up A Girl enikelela izikole ngamaqakelo. Lokhu sekuzale nolunye uhlelo losebenza ngokubambisana nabespecsavers ukunikelela abafundi ngosizo lokucwaningwa amehlo mahhala baphinde bathole nezibuko zamehlo.
Akagcini lapho, unikela nangamaqakelo nezinye izinsiza zokufunda.
Unoxolo Princesslortts wevibe FM unohlelo lokuthuthukisa amantombazane i-empower The Girl Child nolungagcini nje ngolwazi kodwa uphinde abavulele amathuba omsebenzi. Uphinde elule isandla emphakathini ngezinto ezahlukene, alekelele namaciko asafufusa endimeni yomculo.