Usengene kowokulungisa osofa ophoxwe obalungisayo
UKUSALA nosofa ayethi uyasiza ukuze ulungiswe, kumvulele ithuba lebhizinisi ayengekho ezinhlelweni zokulenza.
Unksz Sesinabo Myeza wakwamashu ongumnikazi wenkampani elungisa osofa izwide Upholstery, uthe wayengenaso isifiso sokuqala ibhizinisi lokulungisa osofa, wangena kulona sakudlala ngemuva kokuthi umuntu owayeqashe kwamakhelwane wakhe owayemlungisela usofa awushiya engawuqedile.
Uthe babevumelene ngokuthi uzohamba ayosebenza kwamanye amakhasimende bese ebuyela kusofa wakhe ngoba wayengawujahile.
"Akabange esabuya, ngenhlanhla usofa wawusele kimi futhi besijwayele ukubalungisa naye abanye uma enomsebenzi omningi. Kuthe esehambile ngazithengela amathuluzi ngawuqedela ngoba ngangingafuni ukuwuhambisa kwenye indawo," kusho yena.
Uthe uyathanda ukuthi uma enze into ayishuthe bese eyifaka ezinkundleni zokuxhumana okwenza ukuthi athole amakhasimende ayekuqonda ukuthi useyimfunda.
Uqhube wathi ubevele enebhizinisi lokuhlobisa alisungula ngoba engawutholi umsebenzi eseqede ukufunda.
"Ukungena kuleli bhizinisi nami kungisizile njengoba ngisebhizinisini lokuhlobisa nalo elinosofa. Uma ngingasawuthandi usofa noma sengifuna ukushintsha indwangu ngifake entsha esuke isezingeni ngaleso sikhathi ngiyakwenza lokho. Sengiyakwazi ukuthenga osofa abadala ngibalungise bese ngiyabadayisa noma ngiqashise ngabo," kusho unksz Myeza.
Unksz Myeza uthe okuhlekisayo ukuthi uyakuzonda ukuthunga, uma edatshukelwe ingubo akayithungi ngoba akathandi ukuthunga.
“Ngicabanga ukuthi ukulungisa usofa ngikuthanda ngoba iso lami lithanda into ewumhlobiso. Ukulungisa usofa kusondelene nokuhlobisa,” kusho yena.
Uthe wafundela ukuba usonhlalakahle waphothula ngo-2017 wangawuthola umsebenzi waze waziqalela elakhe ibhizinisi ngo-2019.
"Njengamanje angisawufuni umsebenzi ngizikhulisela ibhizinisi lami. Elokuhlobisa ilona eselisesigabeni sokusimama. Elokulungisa osofa alikakhuli kakhulu kodwa liyeza futhi angijahile ukuthi lidlondlobale ngoba ngisebenzela ekhaya," kusho unksz Myeza.