Owestellies ukhuthaza umgadli oqhulula amagoli kwidiski
UKHUTHAZWA ukuthi angalilahli ithemba lokudlala esigabeni esikhulu umgadli westellenbosch FC, umarvin Boji, obeqhulula amagoli eqenjini ledstv Diski Challenge.
Umqeqeshi westellies kwidiski u-evangelos Vellios, unxenxa uboji ukuthi aqhubeke nokuzikhandla njengoba lizogcina lifikile ithuba lokuzibonakalisa esikimini esikhulu.
Uboji ubeqhulula amagoli ngesikhathi istellies iwina iligi yediski ngo-2022. Uphinde okufanayo ezakhe ziwina indebe ye-english Premiership Next Gen Cup e-england.
Bekubhekwe ukuthi lo mgadli athole indawo esikimini sedstv Premiership esiphekwa ngusteve Barker, nokho akwangenzeka yize esaqhubeka nokushaya amagoli kwidiski.
Lo mdlali ujwayele ukunikwa imizuzu embalwa uma sekuzophela imidlalo eqenjini elikhulu kanti kwele-diski imidlalo eminingi.
Abadlali awine nabo iligi yediski bayazitamuzela isikimu kwelepremiership. Kulaba badlali kukhona u-antonio van Wyk, Devin Titus nojayden Adams obesesikwatini sebafana Bafana, esibuye nendondo yethusi kwi-africa Cup of Nations (Afcon) e-ivory Coast.
Esikimini sepremiership uboji ubanga indawo no-iqraam Rayners.
“Umarvin ulinde ngemuva kukarayners esikimini sethu sepremiership kanti akulula ukuthola isikimu kusona. Siyamtshela ukuthi akaqhubeke nokwenza lokho akwenzayo kwesincane.
“Uyalithola ithuba elincane uma umdlalo usuzophela. Ushaye enye yamaphenathi abalulekile ngesikhathi sigcina ukuwina indebe yecarling.
“Okufanele akwenze wukugxilisa umqondo wakhe emsebenzini ngoba kungenzeka ngo-2025/2026 abe ngumgadli oqavile westellenbosch. Makabekezele alinde ithuba lakhe,” kusho uvelios oyiphini likabarker esikimini sepremiership.
Istellies ibalwa namaqembu asethubeni lokuwina iligi yediski. Isendaweni yesibili kwilog ngamaphuzu angu-48 emuva kwemidlalo engu-22.
Isele ngamaphuzu amabili kwimamelodi Sundowns eseqhulwini ngawu-50 emidlalweni engu-22. Istellies izobhekana necape Town Spurs ngesonto emdlalweni ozovulela owabakhaya basesoweto, i-orlando Pirates nekaizer Chiefs, etsakane Stadium egoli.
“Sinezinto esizibekele zona, uma sifinyelela kuzona, sizoqala lapho ukubheka i-log ukuthi imi kanjani. Uma singayiwinanga iligi kodwa sazuza lokho esizibekele khona, kuyobe kulungile.”