Kuntwela ezansi ngomdonsiswano ebholeni
KUBE yisinyathelo esiletha ithemba ukuvuma kukasihlalo we-premier Soccer Leagues (PSL), udkt Irvin Khoza, ukuhlangana nomqeqeshi weqembu lesizwe ibafana Bafana, uhugo Broos.
Laba bafakane amehlo ngemuva kwesicelo sikabroos osekunesikhathi eside ekhononda ngokungabambisani phakathi kwakhe nabaqeqeshi besigaba se-premiership kuleli, okuyiso adonsa kuso kakhulu abadlali abazomela izwe. Yize ubroos ekuvezile ukuthi umhlangano awuzikanga ngenkulumo ngenxa yokuthi ukhoza uphawule ukuthi kungakuhle babe khona bonke nabamele amaqembu eligi, kodwa lokhu kubonakala kukhomba ukuthi lo mdonsiswano hleze ungaphela.
Ubroos uyaziwa ngokungafihli lutho ngalokho akucabangayo njengoba kungamhluphi nokweneka ubuthaka ngabaqashi bakhe kwi-south African Football Association (Safa). Uze azicelele umhlangano ngokwakhe nosihlalo WE-PSL ngoba vele kungekho budlelwano obutheni phakathi kweligi nesafa.
Eqinisweni kumele ngabe ukubonisana okufana nalokhu kwenzeka ezingeni lazo izikhulu zesafa NE-PSL, bese umqeqeshi axhumane nabanye abaqeqeshi.
Kulichilo ukuthi abaholi abanikwe umsebenzi omkhulu kangaka bayinkukhu nempaka ngale ndlela yokuthi akukho nokuxhumana ezintweni ezimqoka ezithinta umdlalo wesizwe. Kwahlala obala lokhu ngesikhathi I-PSL ingayingeni eyokumisa imidlalo yayo inikeze isikhathi esasicelwa ubroos ukuze iqembu lesizwe liyolungiselela i-africa Cup of Nations ebise-ivory Coast ekuqaleni konyaka.
Kwaba yishwa okungamele liphindeke. Sinethemba lokuthi le nguyazana kamkhathini, ubroos namaqembu E-PSL okubhekwe ukuba yenzeke ngenyanga ezayo izothela izithelo ezinhle ukuze kwehle ukukluluzana phakathi kwalezi zinhlaka ezisebenzisa abadlali abafanayo nokumele ngabe zihlala ngokuxhumana.