Ugwetshwe iminyaka ngokubulala ngezibhelu
UGWETSHWE iminyaka engu-20 ebhadla ejele yinkantolo enkulu yasescottburgh izolo owesilisa
(38) emva kokulahlwa ngecala lokubulala umuntu ngezibhelu.
Ujoel Fenton Pillay kuthiwa wadubula wabulala umnuz Lindani Mthethwa everulam ngojulayi 12, 2021.
Ngokusho kokhulumela inational Prosecuting Authority, unkk Natasha Ramkisson-kara, upillay leli cala walenza ngesikhathi kunezibhelu, kutatshwa ezindaweni ezahlukene Kwazulu-natal.
Elandisa ngesigameko uthe umthethwa wahlaselwa upillay ezihambela emgwaqweni u-ireland everulam.
“Upillay owayehamba ngemoto eyayinemibhalo ekhombisa ukuthi eyenkampani yonogada, waqale wamdlula umufi.
“Kuthiwa wabuye wajika, wabuya eza ngakumthethwa, wathi uma eseqondene naye, wehlisa iwindi lemoto ayehamba ngayo wamdubula ekhanda,” kuchaza unkk Ramkisson-kara.
Uthe umthethwa washonela endaweni yesigameko. “Ecaleni lombuso, u-advocate Thabani Buthelezi uhole ubufakazi bababili abazibonela kwenzeka isigameko, kanjalo nobufakazi be-tracking device eyayifakwe emotweni eyayihamba upillay obabuchaza ukusuka nokuhlala bezindawo ezahanjwa upillay ngosuku lwesigameko,” kusho unkk Ramkisson-kara.
Uveze ukuthi ubuthelezi uphinde waletha phambi kwenkantolo isitatimende esabhalwa udadewabo kamufi elekelelwa isisebenzi senkantolo unkk Thandeka Nadi Mofokeng.
Esitatimendeni sakhe uthe umthethwa wayenguhlobo lomuntu olusebenza ngokuzikhandla.
Uthe emndenini wakhe selokhu kwashona umufi akubange kusaba kuhle ekhaya ngoba nguye abebethembele kuye,” usho kanje.
Uthe udadewabo kamufi wengeza ngokuthi isigameko sabalimaza kakhulu emoyeni njengoba namanje zisadlala izithombe emqondweni ngesimo abamthola eyiso esebulewe.
Egwetshwa upillay, inkantolo ithe ukwehla esigwebeni esijwayelekile sikadilikajele, ngesizathu sokuthi ubeqala ukwenza icala.
“Inkantolo imgwebe ngendlela efanele yaphinde yanquma ukuthi akumfanele ukuphatha isibhamu,” kuchaza uramkisson-kara.
Uphethe ngelithi beyinpa bawushayela ihlombe umsebenzi wethimba labashushisi nabebebambisene nabo ukuthi kugwetshwe upillay.