Ukuhlaselwa kwemoscow kungaba wuthuthuva olusha
SINGABUKEKA siqhelile kithi isiga esehlele irussia, lapho kufe khona abantu abangu-137 ngolwesihlanu, ngemuva kokuhlaselwa ngezibhamu, ontshumentshu neziqhumane ekhonsathini ebisemoscow. Kepha, empeleni baningi abazothelwa amachaphazelo.
Kumanje abasolwa abane abanukwa ngesenzo sokuhlasela baboshiwe kanti sekuvele iqembu lamasulumane elaziwa nge-islamic State (ISIS), elithi yilona elakhe itulo lokuhlasela.
Kuyaziwa ukuthi kukhona impi ephakathi kwerussia, nomakhelwane bayo i-ukraine. Bekulindelekile ukuthi umengameli waserussia uvladimir Putin, anuke izimbangi futhi cishe yizo azokhiphela kuzo ulaka.
Uputin akakaze ayiphathe indaba YE-ISIS ngalokhu kuhlaselwa okwenzeke ecrocus City Hall, emoscow. Ngaleyo ndlela kusobala ukuthi ubona ukukhonjwa kweqembu lezidlamlilo njengendlela yokudukisa umkhondo okuqhutshwa yizitha zakhe.
Izolo isibalo sabantu abafile bese senyukele ku-182, abangu-101 bebelashwa ezibhedlela.
Uputin ngomgqibelo akananazanga ekhomba i-ukraine, ngenjumbane yize umengameli wakhona uvolodymyr Zelensky, esethe akanalwazi ngokuhlasela. Uputin uthe abasolwa babanjwe bezama ukuyokweqa umngcele bebheke e-ukraine, lapho bese kulungiswe indlela yokuthi bashushumbiswe baphume erussia.
Njengoba amazwe asentshonalanga aholwa yi-united States, eyichitha eyokubandakanyeka kwe-ukraine kulesi sigameko, kusobala ukuthi ikremlin izokuthatha lokhu njengecebo lezitha zayo. Iyaziwa inkinga eyanamatha amazwe ngesikhathi kuqala impi yala mazwe eminyakeni embalwa edlule. Kumanje umnotho womhlaba nokuhweba ngokukhululeka kwamazwe akukaze kubuyele esimweni. Amazwe amaningi, okubalwa neningizimu Afrika, aphazamiseka ngokuhweba ne-ukraine, ekhiqiza kakhulu amafutha okupheka nowoyela. Ukuchitheka kwegazi ngale ndlela esikhathini esinje kuyizindaba ezimbi. Ngesizulu kuthiwa ukusuza kuhlola ukunya.