Ayinuki ingosiwe Somlomo wephalamende
MHLELI: Ngabe ukubhekana nengalo yomthetho kwabawuphulile kwabekelwa abantukazana abadla imbuya ngothi yini ngoba osopolitiki begijimela ezinkantolo beyovimba ukuba baboshwe?
Okwenzekayo ngabe sekukhombisa khona ukuthi kwi-anc kukhona ababukeka bebalulekile kunabanye ngoba sibabonile abanye abasezikhundleni eziphezulu beshenxa ngenxa yezinsolo zokuphambana nomthetho. Abakaze besekwe ngale ndlela okwenzeka ngayo kusomlomo wephalamende unosiviwe Mapisa-nqakula.
Ngibuza lokhu ngoba owabe engumengameli waseusa udonald Trump ugqigqa ezinkantolo kumanje emva kokuboshwa maqede wakhokha ibheyili, lapha-ke sikhuluma ngabaholi abasemazweni osekuneminyaka aziwa ngempucuzeko.
Kunasiphi isizathu ukuthi usomlomo avunyelwe ukuthatha ilivu eyisipesheli? Ngabe lokhu ukwenza ngoba nakhu sekusele isikhathi esicishe silingane nezinyanga ezimbili kuyiwe okhethweni ukuze aphume sekuphela ngesikhundla sakhe njengosomlomo bese ethola zonke izimfanelo zakhe ngoba phela ubeseshilo ukuthi usezothatha umhlalaphansi?
Sibabonile abanye bezishenxela bona kusavele izinsolo bengakaze babhekane namacala.
Kwenziwa yini ukuthi njalo amalungu E-ANC uma enukeka emacaleni enkohlakalo agxeke izinhlaka ezibhekele ubulungiswa kwezomthetho bagcine sebethi zenza okwakwenziwa yizinhlaka zomthetho ngesikhathi sobandlululo? Uma unembeza wakhe umsulwa kungukuthi akanacala yini ndaba alingise inkukhu uma ishiswa ukukhipha iqanda?
Okumele kubakhanyele abe-anc wukuthi wonke umuntu uyalingana phambi komthetho. Bona babuswa yinto eyodwa yokuthi uma bengena ephalamende bazibona bengonkulunkulwana okumele balawule ukusebenza kwezinhlaka zomthetho.
Usekhohliwe yini usomlomo ukuthi lona ozwe maqede wazomduduza kwakhe watshela izwe lonke ukuthi bonke banezinto abanukeka kuzona?
Amanqe awandizeli endaweni azi kahle ukuthi akazokuthola lutho azoludla kwazise ukuthi ahogela iphunga esekude. Namanje-ke sesingathi kugcwaliseka isisho sesizulu esithi ayinuki ingosiwanga. Kumele yosiwe ukuze nokude adotshwe yiphunga layo.