Amazulu awachithe I-ANC egcwanekayo
MHLELI: Ngicela ungiphe isikhala ngivuse amazulu ngeanc yakwazulu-natal, ikakhulu njengoba kuza ukhetho lwangomeyi 29, 2024.
Sesifikile isikhathi sokuba amazulu aphume ngothi lwawo ngalolo suku ayokhipha emandleni okuphatha kwesitha sikazulu ekubusweni kwezwe lakithi, ikakhulu EKZN.
Isenzo sikamnuz Sboniso Duma asenze emcimbini wokukhunjulwa kwesilo umamonga wosuthu Kwaceza kwephezulu, sikhombisile ukuthi impela ukhuni luzala umlotha.
Ubuholi bakhe nozakwabo abuyi nakuya kubaholi abebengaphambi kwabo. Isenzo sakhe sokuyebula umbhobho kundunankulu wesizwe samazulu, umfu Thulasizwe Buthelezi, sikhombise ubuluhlaza nokugcwaneka.
Lokho ukwenza kwakhe sekugxekwe kakhulu kugcizelelwa ukuthi ubedelela isilo umisuzulu kazwelithini Zulu nondunankulu wakwazulu-natal. Engani undunankulu kazulu ungumlomo wesilo.
Uma abezokusho undunankulu ubekubona kuzoba ukubheda bekumele alinde akhulume bese emangala esilweni nakuhulumeni wakhe.
Okucobe amathambo ukuthi lapho silinde ukuba iqembu lakhe limsole livele lathi liyameseka.
Angisaphathi inkulumo eluhlaza cwe eyenziwe ngunobhala kakhongolose esifundazweni. Inkulumo yakhe ibithi isikhundla sobundunankulu kasikho kuhulumeni nangaphambilini, ngakho abasigqizi qakala.
Uqonde ukuthini ngesilo okuyiso esamqoka?
Le nkulumo ikhombisa ukudela isihlalo nathi njengozulu. Lesi sikhundla sidala ngisho ingakabi bikho le politiki yabo nanohulumeni. Isikhundla sikandunankulu besikhona ngisho kusakhonya ilembe. Undunankulu kayise nomkhulu walo kwabe kungumntwana unkwelo. Ngisho inkosi umalandela endulo yayinondunankulu, umnawayo, untombela.
Ake simtshele umtolo ukuthi lesi sikhundla asifakwanga kulabo hulumeni ababalile ingoba sasiphethwe umzondwase inkosi umangosuthu Buthelezi. Ize yakhothama inkosi ushenge ikhala ngokungahlinzekwa kwesikhundla sikandunankulu ngamahhovisi nangomholo.
Uma singekho isikhundla, abakakhongolose babeyocelelani komdala ukuba asinike omunye wabaholi beqembu labo owaba ngundunankulu EKZN waphinde waba ungqongqoshe wezempilo kuzwelonke? Ngabe sasisekhona isikhundla njengoba babesifuna?
Le nkulumo nesenzo sakwaceza siveza inzondo ukhongolose wasekzn onayo nesizwe samazulu. Mhlawumbe babesebancane oduma nomtolo, asikhohliwe umhlonishwa umandela ebuya ejele ethi akukho ndoda eyohola ingasebenzile.
Waze wathi isilo kumele siyosebenza. Asikhohliwe umntwana edalula ukuthi umholi waleli qembu wasekzn owala ukuba kusayinelwe ukuba isikhundla sobudunankulu sihlinzekwe ngomholo namahhovisi.
Ngibona kube inhlanhla ngokuba la madoda akwenze lokhu kuza ukhetho. Amazulu awahambe ayokhipha iqembu likamtolo noduma ekuphatheni ngoba uma bake babuyiselwa bazobhebhezela ukungahloniphi nodlame baphinde baqede ngozulu.
Kufana nenkulumo abalokhu beyisabalalisa yokuthi I-IFP yashaya amalungu KA-ANC Kwaceza, ipolitiki eshibhile neqhathayo. Amabutho azichazele ukuthi amalungu awo ashaya abantu. Pho ingenaphi Inkatha? Madoda lungisani ulimi ningaqhathi isizwe sembube. Sengathi ungizwe Mchunu wayeqinisile uma ethi wayengcono umnuz Sihle Zikalala nobuholi bakhe kunabathathe amandla kuye.