Ukuncela idamu kungadala izinkinga emazinyweni nasemlonyeni
AMADAMU ayabasiza omama ngokuthi bancelise izingane ezincane ezikhalayo noma azinikeze intokomalo kodwa kumele bazi ukuthi ukuncelisa ingane yakho idamu kungadala umonakalo emazinyweni okuqala engane noma emazinyweni ayo jikelele.
Isikhulu esiphezulu e-affinity
Health, umnuz Murray Hewlett, sithe eminyakeni eminingi eyedlule abasunguli bawo bebelokhu bewathuthukisa bezama izindlela zokuthi aphephe ngokuthi akhiwe ngerabha ephephile, engakhumuzeki, ethambile engalimazi izinsini kodwa zisekhona izinkinga ezidalwa ukusetshenziswa kwalo kuye ngokuthi ingane ilisebenzise isikhathi esingakanani nokuthi ibilisebenzisa kanjani.
Inkinga yokuhlafuna
Uthe ukusetshenziswa kwedamu isikhathi eside kungaholela ezinkingeni zokuthi amazinyo angaphambili angenhla nangezansi angahlangani kahle uma ingane iluma noma ihlafuna, umlomo ungavaleki ngoba ijwayele ukungawuvali uma incela idamu. Enye inkinga athe iba khona ukuthi amazinyo angenhla angena ngaphakathi uma ingane ihlafuna.
Ukuphazamiseka kokukhula kwamazinyo ngokufanele
Uhewlett, uthe ukulincela isikhathi eside kungaholela ekutheni amazinyo angaphambili aphusheke , angaqondani, nokuholela kulokho okuvame ukubizwa ngokuthi “amazinyo edamu”.
Ushintsho olungenzeka emlonyeni ngenxa yedamu
Ukuncela idamu kungaphazamisa ulwanga (mouth roof) okungaholela ekutheni lukhule ngendlela okungeyona okungaba ukuthi lutsheke.
Akukho konke okubi ngedamu
Ngaphambi kokulahla wonke amadamu, kubalulekile ukuqaphela ukuthi lezi zinkinga ezingase zibe khona ngokuvamile zisukela ekulisebenziseni isikhathi eside, okungaba ukulisebenzisa enganeni eneminyaka emibili kuya eminyakeni emithathu. Izingane eziningi zisebenzisa amadamu ngaphandle kokuba nemiphumela emibi edalwa ukuwasebenzisa isikhathi eside.
Indlela yokusebenzisa idamu ukuze ingane ingabi nezinkinga
Uhewllet uthe : Ncelisa ingane yakho idamu okungenani ngemuva kwamasonto amane iqale ukuncela ibele noma ibhodlela ukuze ifunde ukuhlukanisa ingono nedamu.
Isikali: Sebenzisa idamu ngenhloso yokududuza ingane ngesikhathi ilidinga, alingahlali lisemlonyeni usuku lonke.
Ukulumula: Qala ukulumula ingane yakho edamini kusukela inezinyanga eziyisithupha kuya kwezingu-12, inhloso ukuthi ibe isiliyeke ngokuphelele uma isineminyaka emibili noma emithathu.
Inhlanzeko: Ukuze uvimbele ukubola kwamazinyo engane, zama ukuthi idamu layo lingafakwa izithako ikakhulukazi ezinoshukela. Gwema ukucwilisa idamu oketshezini olumnandi njengoju noma i-syrup, okungaholela ekutheni amazinyo engane abe nezimbobo.
Amadamu alungile: Zama ukusebenzisa amadamu angeyona ingozi kakhulu aziwa ngama-orthodontic pacifiers
Ukulumula ingane yakho edamini kungaba inselelo, amasu ambalwa angakusiza:
Nciphisa ukunikeza ingane idamu kancane kancane, qala ngokuthi idamu lisetshenziswe ngezikhathi ezithile njengokuthi ingane uma ifuna ukulala.
Uma ingane idamu ilisebenzisela ukuziduduza, zama ukuthola ukuthi yini enye eyithandayo engayinikeza intokomalo, okungaba ukuyinikeza ithoyizi elithandayo, noma ingubo yokulala ethile.
Ncoma ingane yakho ngokungalisebenzisi idamu, uyiklomelise
Abanye abazali baqamba inganekwane yedamu, ekupheleni kwaleyo nganekwane idamu liyathathwa.
"Uma ukhathazekile ngamazinyo engane yakho bonana nodokotela wamazinyo wezingane. Banohlelo abalwenzele izingane ezibe nenkinga yokuncela idamu isikhathi eside," kusho uhewllet