Okwenziwe wuduma kuthele uzulu ngetshe lentaba
MHLELI: Ngithi ake ngisike elijikayo ngomuga wakwaceza. Kuyacaca ukuthi abanye bethu kabanalo ulwazi olwanele lokuthi imikhosi yesizwe iyini? Yenzelwani? Yenziwa kanjani, nokuthi labo esemahlombe abo kumele babe kusiphi isimo ngokokuzila?
Abanye bethu kabazi ukuthi abadala bathi ukungazi kufana nokungaboni. Iqinisongqangi ngelithi ngemuva kwempi yasesandlwana, impilo kazulu kayibange isafana imikhakha yonke, kwasuka obekusemsamo kwafumbeka emnyango.
Kwathi obekusemnyango kwalahleka emsamo. Kuyishwa ukuthi kuze kube namuhla akukaze kuhlalwe phansi kubuzwane ukuthi yini ebisemsamo futhi kungani isemsamo? Uma ingasekho emsamo yimuphi umonakalo odalekayo?
Yini ebisemnyango? Kungani ize ibe semnyango? Yimuphi umonakalo owadalwa wukuthi isisemnyango nokuxoveka kwezinto?
Abaningi bethu ngenxa yalokhu kuxoveka bagcina bengasazi ukuthi isitha yisiphi, umhlobo yimuphi. Empeleni abaningi bazi ukuthi isitha uyenamhlobo bese kuthi umhlobo isona sitha.
Uma kufanele uhleke kepha ukhale nxa kufanele ukhale uhleke sithi Kwazulu umhlola, lowo ngoba bathi abakwazulu kukhona okusina kukujeqeza.
Ngifisa ukukucacisa ukuthi nxa ngithi Kwazulu noma umzulu ngikhuluma ngomuntu womdabu ongumsinsi wokuzimilela kwelikagodwane abantwana bakankotheni.
Umuntu womdabu wayexhumana kakhulu nemvelo ehlonipha umnikazi wemvelo umlimi/ umbumbi/umdali onguminini wakho konke. Ngisho konke ukujabula, ukucabanga, impilo, ukupha, ukubonelelana ngingekuqede. Umuntu wayehlonipha umlimi/ umbumbi ngezikhathi zonke ubudlelwano obuhle nomdali babenza kuphilwe kahle.
Umuntu ulwazi ayeluthola kwabadala lwalungalibaleki futhi lungalahleki (umqondo wawelashwa) kusuka umuntu efika emhlabeni wayeshiselwa izinyamazane, abhenyiswe imibhemiso alashwe, imimoya (umdiki, umdawe, umnono, umlozi, kuye ngokhalo lomuntu). Konke lokhu kwakusiza kudale uzinzo, umuntu abe ngumuntu onobuntu.
Konke okubi okwenzeka esizweni sakithi kwenza isitha sigiye ngonoqhakala.
Okwenziwe ngumnuz
Duma ongusihlalo weqembu elibusayo kuthele uzulu wonkana ngetshe lentaba. Phezu kukandunankulu wesifundazwe, phezu kukamengameli wezwe phezu kwezulu eliphezulu, phezu kwamakhosi, phezu kwabazali bakhe naphezu kwezingane zakhe uqobo.
Lokho kuveza obala ukwahluleka kukamengameli wezwe ukushaya isitswebhu, bekumele umengameli amehlise kuzo zonke izikhundla aziphethe khona lapho Kwaceza. Lokho bekuzokwehlisa amaphaphu kubantu futhi bekungezukulimaza muntu njengoba kugcine kulimala abantu bangeniswa ezibhedlela.
Angikweseki ukulinyazwa kwabantu abangenacala uma bekumele kulinyalelwe nguduma obekumele athole izinkobe zezenzo zakhe. Lokhu kungumkhokha kukhongolose. Ukhongolose ufe lapho asungulwa khona ngemva kwempi kakhandampondo kabhambatha kamancinza, inkosi usigananda, umntwana ushingana kampande namanye amaqhawe.
Ngiyehluleka ukugxeka undunankulu kazulu ngenxa yokuthi uphuciwe ilungelo lokukhuluma esaqala ukukhuluma obekuyilungelo lakhe futhi ekhuluma ngobuholi beqembu elilodwa. Ngabe kuhle ukuba abaholi bakakhongolose bahlonipha isilo njengoba behlonipha umengameli wabo. Undunankulu kazulu akasiye ufukwe odlala umdlalo kalingisa kamnikazi wakhe okuzothi uma eceza bese kukhuzwa ubikibiki!
Bekubalulekile kakhulu ukuba indlunkulu ibeke eceleni ukungaboni ngasolinye, ibonisane ngalo mhlola, ikhulume ngazwi linye ngenhloso yokwakha nokulondoloza okwakwabo ukuze kubumbane isizwe. Akukho silima esindlebende kwabo.
Konje kungenzeka yini ukuthi uthuli lwezichwe esilubonayo lusemhlabathini? (umfecane konke kancane, izimpi zomkhaya, Sojiyisa, Indodakusuka, emagongo zepolitiki, zobuhlanga, yamandiya, yabokuhamba njalonjalo).
Nina bendlovu edl’fakazi
Nina besala kunyenyezelwa