Amasu okuthi abasebenzi bahlale benomdlandla
UKWENZA ukuthi abasebenzi bahlale benomdlandla yinsika yenkampani enempumelelo. Abasebenzi abanomdlandla bamandla ngokukhuthala nokuba nezindlela ezintsha zokwenza izinto nokuzinikela ekuphumeleliseni izinjongo zenkampani.
Uma abasebenzi benomdlandla benza okungaphezu kokulindeleke kubona nomsebenzi wabo, bazenzele ezinye izinto – baphokophele ukushaya into ecokeme. Abasebenzi abanomdlandla benza izinto ezinkulu futhi makhulu amathuba okuthi bahlale emsebenzini, ngakho kumqoka ukuqonda ukubaluleka kokukhuthazeka kwabasebenzi nokuthi uthathe izinyathelo zokukhuthaza lokhu.
Nazi izindlela zokuthi ithimba lakho lithelwe ngezibonkolo:
YAZI AMANDLA
Abantu bakhuthazwa yizinto ezingefani kanti njengoba uwumqashi, kumqoka ukwazi ukuthi umuntu ngamunye ukhuthazwa yini. Ezinye izinto ezifanayo ezikhuthaza abantu wukunconywa, imihlomulo namathuba okukhula emsebenzini, ukukwazi ukwenza izinto zabo nomsebenzi, yindawo emnandi yokusebenza nomuzwa wenjongo.
INDAWO EMNANDI
Uma abantu bezwa baziswa, behlonishwa futhi besekwa, makhulu amathuba okuthi bakhuthazeke ukushaya into ecokeme emsebenzini. Ukuvama ukubheka abantu obaphethe, ukubasola ngokwakha nokukhuthaza ukuxhumana ngokukhululeka kungabaneqhaza ekuthembaneni
nasekubambisaneni.
UKUXHUMANA KAHLE
Ukukwazi ukuxhumana nokwelulekana kungabaneqhaza elimqoka ekutheni abasebenzi bakhuthazeke.
Ukuxhumana okucacile kwenza ukuthi abantu obaphethe baqonde umsebenzi wabo nokulindeleke kubona. Kuqinisekisa ukuthi wonke umuntu uyakwazi okulindelwe yinkampani.
Ukuvama ukuxoxa, noma ngabe ngezinto ezimbi noma ezinhle, kwenza abasebenzi ukuthi baqonde ukuthi baqhuba kanjani futhi kubanike amathuba okukhula nokuthuthuka emsebenzini.
UKUNCONYWA NEMIHLOMULO
Ukuncoma nokuhlomulisa umsebenzi wabasebenzi yizindlela ezinamandla zokwenza ukuthi ithimba lakho lihlale likhuthazekile.
Uma abasebenzi bebona ukuthi umsebenzi wabo wokuzikhandla uyabonakala, makhulu amathuba okuthi bahlale bekhuthazekile nokuthi baqhubeke basebenze ngokuzikhandla.
Lokhu kungenziwa ngezindlela ezihlukene njengemiklomelo yanyanga zonke, ukugubha ndawonye, amabhonasi noma izenzo ezincane zokubonga njengemiyalezo yokubonga eqondene nomuntu ngamunye.
AMATHUBA OKUKHULA
Abasebenzi makhulu amathuba okuhlala bekhuthazekile uma benikwa amathuba okusimama futhi bebona amathuba okukhula ngaphakathi enkampanini.
Ukunika abasebenzi amathuba okufunda izinto ezintsha, ukuyocijwa amakhono noma ukwenza imisebenzi ebakhulisayo akugcini nje ngokubakhulisa ngamakhono kodwa futhi kukhombisa inkampani ukuthi inothando lokukhula kwabo.
Abaqashi bangakhuthaza abasebenzi ngokwenza izinhlelo zokubasimamisa, benze izinhlelo zokubacija noma bakhokhele izitifiketi zemfundo.
ISIKO LOKUSEBENZISANA
Ukwakha isiko lokusebenzisana kumqoka ekutheni abasebenzi bahlale bekhuthazekile.
Uma abasebenzi bezwa bexhumene nabalingani babo futhi bezizwa besekhaya makhulu amthuba okuthi bakhuthazeke futhi babeneqhaza empumelelweni yethimba lonke.
Abaqashi bangenza isiko lobunye emsebenzini ngokugqugquzela ukubambisana, ukusebenza njengethimba nokukhuluma ngokuxhumana.
Imidlalo yamathimba, njengokusebenzela ngaphandle kwendawo yomsebenzi noma ukuvama ukuyodla ndawonye, kungaqinisa ubudlelwano.