Kuboshwe osolwa ngokuqotha abangani ‘kubangwa intombi’
KULINDELEKE avele enkantolo yemantshi yasemgungundlovu maduze, osolwa ngokubulala abangani abathathu, okuthiwa ubaqothe ngesibhamu behleli emotweni enkabeni yaleli dolobha ngesonto.
Lesi sigameko okukholakala ukuthi esombango wentombi, kuthiwa abagilwa abane bebezihlalele emotweni beziphuzela utshwala ngesikhathi behlaselwa umsolwa evulela nhlamvu ebhekise kubona.
Abathathu abaneminyaka ephakathi kuka-26 no-36, bafele endaweni yesigameko kwathi oyedwa wadlubulundela kukubi wabaleka enenxeba lokudutshulwa engalweni.
Umsolwa oboshiwe, uthathwe ngalo usuku lwesigameko eyohlonywa ngemibuzo emva kokuthi etholwe nesibhamu okukholakala ukuthi yisona esidubulile.
Ucolonel Robert Netshiunda okhulumela amaphoyisa Kwazulu-natal uqinisekise ukuthi umsolwa uthweswe amacala okubulala, ukuzama ukubulala nokutholakala nesibhamu esingekho emthethweni.
“Nakuba imbangela yokubulawa kwalaba ingakaziwa kodwa kukholakala ukuthi oyedwa kubagilwa owumshayeli wemoto encane ethutha abantu, uthathe intombi endaweni yokuzijuxuza ebihleli nothile wesilisa,” usho kanje.
Kwesinye isigameko esenzeke emijondolo okuthiwa kuse-uganda emlaza, kudutshulwe kwafa abane okuthiwa bebezihlalele emjondolo bephuza utshwala.
Kuthiwa kungene abasolwa abayisithupha bafuna ngodli amafoni kubagilwa. Kuthiwa banqabile ukubanika amafoni, omunye wabasolwa wakhipha isibhamu wadubula abagilwa abathathu,
Kubikwa ukuthi kuthe uma abasolwa sebephuma emjondolo, bahlangana nomgilwa oyedwa okukholakala ukuthi ubephuma endlini encane, naye bamdubula.
Unetshiunda uthe abasolwa basagcwele amathafa kanti imbangela yokubulala ayikaziwa.
“Sinxusa noma ubani ongaba nolwazi olungasiza amaphoyisa kutholwe abasolwa ukuthi athinte amaphoyisa aseduze enombolweni yawo ethi, 08600 10111,” kusho unetshiunda.