Ulaka izingane zibulawa ugesi
UYAVEVA umphakathi wasezwelisha, everulam, kulandela isigameko sokushona kwezingane ezimbili ezisencane ngolwesithathu, zilinyazwa ugesi osocingweni olubiye umuzi kamakhelwane.
Kulesi sigameko kuthiwa kushone izingane ezimbili, eneminyaka emibili neneminyaka emithathu. Kuthiwa imijondolo yemindeni yabafi yakhelene kanti bajwayele ukudlala ndawonye.
Ikhansela lendawo, umnuz Nkosi Mhlongo lihambele indawo yesigameko ngalo ulwesithathu.
Likhuluma nesolezwe izolo, lithe lifike labhula ulaka lomphakathi obudinwe ugane unwabu ngesehlakalo.
Umhlongo uthe ufike wathola emphakathini ukuthi umnikazi wocingo olubulele izingane useke wakhuzwa ngalo, umphakathi ususho nokusho ukuthi indlu yakhe ayishiswe.
“Alunaso isexwayiso esishoyo ukuthi luyashokha. Ngithole ukuthi luhlale lushokha amalungu omphakathi asuke ezidlulela kule ndawo njengoba luseduze kwendlela,” kulandisa umhlongo.
Uqhube wathi umphakathi umtshele ukuthi ubuthi uma umtshela umnikazi walo ukuthi akalukhiphe ugesi, aphendule ngokuthi abashokhwa yilo basuke belandeni eduze kwalo?
Udalule ukuthi lona wesilisa sekuphele izinyanga ezintathu engabonwa endaweni kanti akajwayelene namuntu emphakathini.
“Akekho noyedwa onenombolo yakhe yocingo. Bengithi ngifuna ukumshayela ucingo ngimtshele ukuthi akasondele eduze ngomshophi osuthe wavela,” kusho umhlongo.
Uveze ukuthi ugcine ekhipha umyalelo wokuthi ugqashulwe esigxotsheni esiseduze ugesi lapho oxhunywe khona.
Elandisa ngesehlakalo uthe uthole ukuthi izingane bezidlala eduze kwalo ucingo.
“Kuthiwa kuqale kwashokheka eneminyaka emibili ngoba yona itholwe ibambelele ngazo zombili izandla ocingweni. Lena eneminyaka emithathu yona ibibambe isandla salena eneminyaka emibili. Sisola ukuthi ibizama ukuyidonsa kanti nayo izobambeka,” usho kanje.
Uthi ozibonile, ngomunye umakhelwane, ogijime wayozama ukuzisusa, seziqala ukukhihliza amagwebu.
Uveze ukuthi ebona ukuthi naye uyashokheka, ubuyele endlini wayolanda ingubo yokulala, wazidonsa ngayo, kwayima zisuka ocingweni.
“Ziphuthunyiswe esibhedlela kodwa zashonela khona,” kusho yena.
Okhulumela amaphoyisa Kwazulu-natal, ucolonel Robert Netshiunda, uthe amaphoyisa aseverulam aphenya idokodo lokufa kwabantu kulandela isigameko lapho izingane ezimbili, eneminyaka emibili neneminyaka emithathu zishokhwe ugesi ngolwesithathu.
“Isigameko senzeke ezwelisha. Bobabili abagilwa baphuthunyiswe esibhedlela kodwa kwatholakala ukuthi sebeshonile ngesikhathi befika. Izimo eziholele ekwenzekeni kwesigameko ziyaphenywa,” kusho unetshiunda.