Ubritney weneka ukuphoxwa yisoka nokulawulwa nguyise
INCWADI: The woman in me UMBHALI: Britney Spears ABASHICILELI: Gallery Book UK
KUSUKELA eqala ukucula eneminyaka ewu-15, ubritney Spears, usebengundabuzekwayo iminyaka eminingi ngenxa yezizathu ezahlukene.
Encwadini ethi The woman in me ebhalwe ngubritney Spears, umculi ugonyuluka ngempilo yakhe. Kusukela ekhula elouisiana, ukungena emculweni, ukuqoma, ukuhlukunyezwa ngumndeni wakhe, ukuboshwa, ukushada, nokudivosa nokunye.
Udweba isithombe sowesifazane othwale kanzima ngesikhathi uyise ethola igunya lokulawula imali nempilo yakhe iminyaka eminingi.
Uchaza ngokuhlaselwa wukhwantalala, ukuphuma engena ezikhungweni ezelapha abacwile otshwaleni nasezidakamizweni. Udalula ukuphelelwa yithemba ngesikhathi ephucwa ilungelo lokukhulisa abafana bakhe ababili.
Wenaba ngobuhlungu nokuhlambalazeka ngemva kokwehlukana nowayeyisoka lakhe ujustin Timberlake, umculi wase-usa.
“Ngemva kokwehlukana kwethu, ujustin walala nabesifazane abayisithupha noma abayisikhombisangezwa kanjalo,” kubhala ubritney ekhasini 93.
Ubritney uthi wafunda kwezakhe ukuthi kumele aqhubeke nempilo ngoba sebehlukene nojustin. Langa lithize omunye uphrojusa wamkhombisa enye insizwa kanti ngucolin Farrell, umlingisi wase-usa.
“Ngashaya imoto ngaya lapho okwakuqosha khona ifilimu IS.W.A.T ...... Ngaqonda lapho kuqoshwa khona kanti ngizobizwa ngumqondisi wefilimu wathi, “Hlala esihlalweni sami”
“Waqhamuka ucolin Farrell, wathi kimina”ngabe kukhona amathiphu onganginikeza wona,” encokola.
Uthi bajola into ewumlilo wamaphepha cishe amasonto amabili nocolin. Weneka impilo yomndeni wakhe lapho unina wayeshayisana noyise owayecwila otshwaleni.
Ugxeka abazali abaphoqa izingane ukuthi zisheshe zingene kwezokungcebeleka ngethemba lokuthi zizokwenza imali bese zondla imindeni.
Uthi wayezazi ukuthi unekhono lokucula kepha wayengazitsheli ukuthi wonke umthwalo wakubo nezinkinga kuzoba semahlombe akhe, ekubeni waqala ukucula eneminyaka ewu-15.
Uthi konke kwashintsha ngo2022 ngesikhathi ethola ummeli owamlwela enkantolo noyise, owayegweve nemali yakhe futhi emlawula njengengane.
“Sengiqalile ukuthokozela umcebo wami njengowesifazane omdala okokuqala empilweni yami ......
“Ngemuva kokuthola inkululeko yami, ngabona kuyinkomba yokuthi ngikhiphe unyawo ngishaywe wumoya. Ngivakashele lapho ngithanda khona noma yinini .
“Ngavakashela izindawo engizithandayo, ngijabuleka inkululeko yami,” kubhala ubritney, ekhasini 269.