Abeyoung Elephant babona isabambe ngakho ngabanikwe ithuba
ABAPHATHI beyoung Elephant edlala kwisafa Uthukela Hollywoodbets Regional League, bathi kubahlaba umxhwele ukubona abadlali baleli qembu belibamba ngazo zombili ithuba abanikwa lona lokuveza amakhono abo ngenhloso yokuthi ngelinye ilanga balandele ezinyathelweni zamaqhawe abo esigabeni esikhokhelayo.
Iyoung Elephant yasemhubheni, entabamhlophe, emtshezi, esungulwe ngonovemba ka-2022, nokuyisizini yayo yokuqala le igijima esigabeni se-regional League, yiyona esazihola phambili kwi-log yalesi sigaba.
Njengamanje ihlezi phezulu ngamaphuzu angu-69, ilandelwa ezithendeni yijunior Eleven ngamaphuzu angu-68 emidlalweni emihlanu esele ngaphambi kokusongwa kwesizini ka-2023/2024.
I-elephant ethole amaphuzu amathathu ingawajulukelanga igingqela idubai FC engafikanga enkundleni emdlalweni wangempelasonto, izobhekana nothukela Wanderers, E-AG Stadium, E-AG Magubane Stadium, esteadville, emnambithi, ngesonto ngo11 emini.
Kuthi izimbangi zayo ijunior Eleven ibhekane nemakhanyakude FC, ebergville Sports Complex, ebergville ngalo isonto ngo-1 ntambama.
Umduduzi Mncube oyimenenja ye-elephant eqeqeshwa wumzamo “Mjojana” Hlongwane, uthe imidlalo emihlanu ebasalele ifana neyamanqamu njengoba befuna ukuzibekisela indawo kumaplay-off esifundazwe.
“Sibhekana nomdlalo ngamunye, kuyoze kube ngumdlalo wokugcina. Esesizibophezele ngakho njengamanje wukuthi silwele ukubuya namaphuzu kuyo yonke imidlalo emihlanu esisalele, njengoba iqembu esibanga nalo ijunior Eleven lisilandela eduze kakhulu.
“Khona siyazi ukuthi le midlalo esisalele ayilula neze, ikakhulukazi njengoba sisazodlala nayo ijunior Eleven kodwa inhloso wukuthi siqede siphezulu siye kodlala amaplay-off esifundazwe,” kusho umncube.
“Kusihlaba umxhwele njengabaphathi beqembu ukubona abafana esibanike ithuba ngokusungula leli qembu, belisebenzisa ngendlela efanele ukuveza amakhono abo.
“Siyiqembu elinezinhloso ezinkulu kodwa futhi sithatha isinyathelo ngasinye ngaphandle kokuzifakela ingcindezi.
“Ekusunguleni kwethu leli qembu enye yezinhloso zethu nosihlalo weqembu, umbuzeni Mkhize, kwakuwukuqoqa intsha yasentabamhlophe namaphethelo ngokuthi idlale ibhola ukuze igweme ukungena ogibeni lwezinto ezingalungile,” kusho umncube.
Indawo yasentabamhlophe, emtshezi, yilapho kudabuka khona usibongiseni “Ox” Mthethwa ongumdlali wasesiswini odlala kwikaizer Chiefs.
“Abafana kuyabakhuthaza kakhulu ukubona ubhuti wabo omdala esedlala ibhola kuleli zinga akulona njengamanje. Kubenza babone ukuthi ngokusebenza ngokuzikhandla abanye babo nabo bangagcina befinyelele kuleli zinga akulona u-ox ngelinye ilanga.
Okubakhuthaza nakakhulu wukuthi naye u-ox uma ebuyela emakhaya uma kuvalwe isizini uyahlangana nabo abakhuthaze.”
Umdlalo we-elephant nejunior Eleven ngo-ephreli 28, e-estcourt Secondary Ground, yiwona okubukeka ungase uhlukanise inhloko nesixhanti ngombango wesicoco seligi phakathi kwala maqembu asembangweni oshisa phansi.
Ngenxa yokuthi iligi yesafa Uthukela Regional League iyi-stream esisodwa, iqembu elizoqeda liphezulu lizoya ngqo kumaplay-off okuhlungela ukungena kwi-kzn Safa ABC Motsepe League.
Njengamanje isifunda uthukela simelwe yidrakensberg FC kwi-abc Motsepe League, ebalwa namaqembu enza kahle kulesi sigaba njengoba isendaweni yesithathu kustream B walesi sigaba.
Imidlalo yesafa Uthukela Hollywoodbets Regional League:
Ngesonto: Ngo-9am: Ezakheni
Real Magic v Qhakaza (AG Magubane Stadium)
Ngo-11am: Uthukela Wanderers v Young Elephant (AG Magubane Stadium)
Ngo-1pm: Royal Tigers v Lacoster FC (AG Magubane Stadium); Makhanyakude v Junior Eleven (Bergville Sports Complex)
Ngo-3pm: Pieters Fast Eleven v Barcelona FC (Mangcengeza High Stadium); Tsamany Academy v Natal Witness (AG Magubane Stadium);
Dubai FC v Rookdale United (Bergville Sports Complex); Mnambithi All Stars v Ladysmith Juventus (Kandahaar Stadium)