Usono akafuni ukuxhamazelela IPSL
UVEZA ukuthi ngeke nakancane enze iphutha lokuxhamazelela ukubuyela kwipremier Soccer League (PSL) ujomo Sono ongumnikazi wejomo Cosmos engelinye lamaqembu anomlando ebholeni lakuleli. Esigabeni esiphezulu sedstv Premiership, Ezenkosi zidliwe yizembe ngesizini ka-2015/16 eziyisonge zisekugcineni.
Kwinational First Division (NFD) eseyaziwa ngemotsepe Foundation Championship, zihlale amasizini ayisithupha.
Izembe likhale kweka-2021/22. Isizini ephezulu ngeyesibili icosmos idlala kwigauteng ABC Motsepe League.
Kweyokuqala bekwethenjwa ukuthi izokwazi ukubuyela kwimotsepe Foundation nokho kwabheda.
Isicoco sigcine sidliwe yidondol Stars nayo engalibonanga elidlalayo emidlalweni yokuhlungela ukwenyukela kwimotsepe Foundation.
Kule sizini Ezenkosi zilele endaweni yesithathu ngamaphuzu awu-60 emidlalweni ewu-31. Zisalelwe eyisikhombisa zisonge iligi.
Kuqwakele idondol ngamaphuzu awu-71. Kweyesibili kunehighlands Park ngawu-64.
Baningi abakusho bangakufihli ukuthi sekuphelile ngaleli qembu elasungulwa ngo1983.
Bathi ngeke lisabuyela kwipsl, ingasaphathwa-ke eyokushaya ibuya kwidstv Premiership. Babodwa abasola usono ngalokhu.
Ugxekwa ngokuqhubeka nokucija icosmos ekubeni kubonakala ukuthi izinto ziyamphika. Engxoxweni Isolezwe elibe nayo nosono, uthe ngeke anake abantu abagxekayo ekubeni bengalazi ibhola. Uthe abazi nokuthi icosmos isebenzela phezu kwaluphi uhlelo.
Uveze ukuthi befika kwimotsepe League bazibekele umgomo wokuzama ukubuyela kwipsl ngesizini yesithathu.
"Izinto zihamba njengokuhlela kwethu. Isizathu esenze ukuthi sithathe isinqumo sokufuna ukubuyela kwipsl ekusongweni kwesizini yesithathu ukuthi sifike kwimotsepe
League sidlala ngabafana abancane, abangenasipiliyoni. Kasethukanga uma singenzi kahle.
“Kwisizini esikuyo laba bafana sebeqala ukuvuthwa. Sebeyasiqonda lesi sigaba. Empeleni bengingalindele ukuthi bangabeka icosmos kule ndawo ekuyo.
“Ukulwela ukubuyela kwipsl sizokuqala kwelandelayo.
Abadlali bami bazobe sebevuthwe ngokwanele," kubeka usono obelokhu ekusho njalo ukuthi ngeke iphele ijomo Cosmos. Uncome izinga lebhola elidlalwa kwimotsepe Foundation.
"Abantu abalaziyo ibhola bazi kahle ukuthi akusiniswa mahleza kwimotsepe League.
“Empeleni ngamaqembu aphuma kwipsl athwala kanzima. Akusafani nakuqala, izinga liphezulu. Okunye okubuye kube inkinga wubugebengu obenziwa khona".