Sekuyisikhathi somjovo omusha kubanyana Banyana
UKUNGAPHUMELELI kwebanyana Banyana ukufinyelela emidlalweni yama-olympics ese-paris, efrance, nonyaka kubephule umoya abalandeli bebhola kuleli. Ibanyana yehlulwe yinigeria ngo 1-0 sekuhlanganiswe umlenze wokuqala nowesibili, yakhala ngaphansi ekuzibekeleni indawo kuma-olympics. Kwabaningi kukhona ukulixolela leli qembu eliqeqeshwa ngudesiree Ellis ebelishaya into ecokeme kule minyaka edlule. Kumanje lingoshampeni base-afrika ngemuva kokucosha le ndebe emqhudelwaneni obusemorocco ngonyaka ofile. Ngaphambi kwalokho u-elllis wafaka ibanyana kuma-olympics etokyo, waphinde walifaka endebeni yomhlaba e-australia nasenew Zealand.
Yilo mlando owenze kube nenkolelo yokuthi le Banyana isivuthwe ngokwanele ukuthi izongena izimashela kuma-olympics. Kodwa kusobala ukuthi ubhedu luyasetshenzelwa. Hleze sekuyisikhathi sokuthi isafa ijove kabusha iqembu ngezinhlelo zokuvuselela ilukuluku lokulwela ukuwina kubadlali.
Iqiniso lithi isikwati esikhona manje sihle kakhulu futhi siligezile igama lebhola labesifazane eningizimu Afrika. Amava alezi zingane, ebezithwele umthwalo wokuqatha indima entsha yokuwinela izwe okuthile, ngeke abukelwa phansi futhi asadingeka. Okungamele nokho sikubalekele ukuthi nemishini esebenza ngogesi nangowoyela ihamba kufike isikhathi lapho idinga izingxenye ezintsha noma kufakwe emisha eletha mawala umkhiqizo osezingeni elithe thuthu.
Cishe-ke iqembu lika-ellis likuleso sigaba. Akube nesiqalo sokulungiselela iqembu eliyisa phambili umsebenzi owenziwe yithimba. Ukwehlulwa kwebanyana akumele kube yisilonda ngoba leli qoqo selifike lapho kumele ledlulisele esizukulwaneni esizayo. Ukwehlulwa nokuwina kuyingxenye yemidlalo. Ngeke uthi wakha ube uwina futhi. Ukuqhuzuka kwebanyana kuluphawu lokuthi sekumele kubhekwe ukuthi sisasebenza na isiqholo ebigabe ngaso.