Ukusungulwa kwebhange likahulumeni kungaxazulula EYENSFAS
ZIDINGA ukuxazululwa ngesivinini sentulo izinkinga ezikhungethe isikhwama soxhaso lwezitshudeni, inational Students’ Financial Aid Scheme (NSFAS).
Njengoba sekuqokwe umlawuli WENSFAS, umnuz Freeman Nomvalo, onamava ekuphathweni kwemali, makanikwe ithuba futhi esekwe.
Akwamukelekile ukuthi izitshudeni zikhathazeke ngokunganikwa imali yezidingo ngesikhathi ngoba kufanele zigxile emfundweni.
Akuzwakali kahle ukuthi INSFAS ihlulwa wukubhekelela izitshudeni ezibalelwa esigidini esisodwa ekubeni kunesassa eholela izibonelelo zabantu ababalelwa ku-25 million ngenyanga. Akusikho ukuthi imali kayikho esikhwameni kepha kuthiwa umnyombo wezinkinga bekuwukwehlukana kwebhodi nenkohlakalo.
Umonakalo odalekile ushaya ngqo izitshudeni eziyikusasa lezwe. Kufanele kube nokubambisana ekuxazululweni zonke izingqinamba. Akubambisane umnyango wezemfundo ephakeme nokuqeqesha, INSFAS (umlawuli omusha), izikhungo zezemfundo nezitshudeni.
Njengoba kukhonjwa ngenjumbane abanye babasenzi BENSFAS njengamazambane abolile makuphenywe bakhishwe ngokushesha.
Okubalulekile wukuthi kwenziwe isiqiniseko sokuthi izitshudeni zinaka izifundo kuphela. Akulungile ukuthi kube nezitshudeni ezilala zingadlile ekubeni imali ikhona. Ezinye zikhishwa ngoshova lapho zihlala khona bese ziphenduka ondingasithebeni.
Okwenzekayo kuphonsa inselelo kuhulumeni nabaphethe ngokuhluleka wukusungula ibhange likahulumeni. Akungabazeki ukuthi ukube kunebhange elilawulwa wuhulumeni bekuzokuba lula ukukhokha ngezindleko ezincane uxhaso lwezitshudeni nazo zonke ezinye izibonelelo.
Ngabe ziyivela kancane nezinkinga zokuthi sibuye sizwe kuthiwa izimpesheni nezibonelelo zezingane kazikhokhiwe ngesikhathi.