Ulakay ubona ukunqoba umdlalo kuzovula inhlanhla
ISITOBHA sesupersport United, ulyle Lakay, sikholwa wukuthi ukunqoba umdlalo owodwa kuzobavulela izinhlanhla ngoba iqembu alikakanqobi nowodwa umdlalo wedstv
Premiership, kusukela kuqale unyaka.
Iqembu elicijwa ngugavin Hunt, lizovakashelwa yipolokwane City koweligi namuhla ngo-7.30, elucas Masterpiece Moripe Stadium. Emlenzeni wokuqala ayikho eyavuma ukugoba uphondo.
Sekuphele imidlalo eyisishiyagalombili yeligi, isupersport igcine ukunqoba. Yagcina ihlle i-orlando Pirates ngo 31- ngodisemba 23.
Kulolu hambo iphinde yaphuma kabuhlungu esigabeni samaqoqo ecaf Confederation Cup. Ku-group A, yasonga endaweni yokugcina.
Ngempelasonto edlule istellenbosch iyithele induku ka 4-0 iyiwashisa ijezi kuma-quarterfinal enedbank Cup. Kowandulela umdlalo beyishayiwe yits Galaxy ngo-1-0 kuyo idstv Premiership.
Usukhala kanjena nje umpetshisi kwezikalakay, nyakenye kunesikhathi lapho ezike zalala isibili kwilog. Isibhaxu sakamuva nokucazelana amaphuzu nezitha emidlalweni eminingi sekuzehlisele endaweni yesithupha, ngamaphuzu awu-34, kwewu-22. Zibambene ngamaphuzu negalaxy ekweyesihlanu.
Ulakay oyibamba emuva ohlangothini lwesinxele, uthe kuyabaphoxa lokhu kuphikwa imiphumela.
"Kusiphoqa ukuthi senyuse amasokisi, akukho okunye okuzosisiza. Wukunqoba umdlalo owodwa okuzosikhipha kule nkinga. Kumele siqale kuyo ipolokwane City. Phambilini sengike ngaba esimeni esifanayo kwibloemfontein Celtic, nakwicape Town City. Ngiyakuqonda futhi ukuthi akumina ngedwa eqenjini. Ngiphinda ngiyasho, sidinga ukunqoba umdlalo owodwa bese kuvuleka inhlanhla. Ngiyazi ukuthi kunabadlali asebedlale eminingi kunabanye. Ngeke uze usho ukuthi basebancane. Engikwaziyo ukuthi ziyaqinisana izikhathi ezinzima," kubeka ulakay, oseshaye amagoli amane emidlalweni yeligi ewu-20.
Ulakay ungesinye sezithenjwa zikahunt ngoba esedlale eyisithupha yeconfederation Cup, emithathu yenedbank, nowodwa wecarling Black Label Knockout.
"Lesi simo sokuhlulwa amaphuzu amathathu sifike kabi sibheke ekusongeni iligi. Ngenhlanhla wonke umdlali eqenjini uyazi ukuthi kumele siphume ngokushesha kule nkinga. Izimo ezinje zikufundisa okuningi.“
Ulakay oke wagijima nakwimamelodi Sundowns, ucele abalandeli babo ukuthi baqhubeke nokubeseka. Ipolokwane ikweyesi-11, ngamaphuzu awu-28, kwewu-22. Emdlalweni wokugcina ishayiwe yiroyal AM ngo-3-2.