Amehlo azobheka emgungundlovu embangweni wesemotsepe
KULINDELEKE ukuthi kuhlaluke kule mpelasonto ngamaqembu okuzosongwa iligi eqhwakele kuwona womabili amastream, kwisafa KZN ABC Motsepe League.
Kule midlalo yokuvala isizini obhekwe kakhulu ngoka-stream B ophakathi komkhambathi nomsinga United ngo-3 ntambama, ngesonto, eharry Gwala Stadium, emgungundlovu.
Okwenza amehlo athi njo kuwona ukuthi umkhambathi uqhwakele ngamaphuzu awu-42 bese umsinga ube nawu-40.
Umsinga ocijwa umpumelelo Mpanza, kumele unqobe noma ikanjani uma ufuna ukuba ompetha bale Stream. Emlenzeni wokuqala ayikho eyafuna ukugoba uphondo. Ngempelasonto edlule womabili la maqembu aqhubekile nokwenza kahle.
Umkhambathi ushaye ngo 4-0 ithekwini Coastal, umsinga wabhaxabula ititanic ngo 6-0. Naku-stream A kuminyene utshumo. Injampela inamaphuzu awu-35 emidlalweni ewu-15. Kweyesibili kunomkhumbane ngawu-33.
Isizathu esenza ukuthi iligi isongwe emidlalweni ewu-15 ukuthi isouth African Football Association (Safa) ithathe isinqumo sokuxosha kwiligi i-oyzn Academy ebisihluleka ukuhambela imidlalo. Wonke amaqembu adlale ne-oyzn, ayishaya, aphucwe amaphuzu.
Umkhumbane kasithembiso
Mabaso, uphucwe ayisithupha, injampela yaphucwa amathathu. Kwi-stream A, ukuxoshwa kwe-oyzn kusindise ezembeni istone Breakers. Kwi-stream B izembe lishobodele ititanic.
Umkhumbane kumele unqobe noma kanjani kwihellenic, ngomgqibelo, emhlathuze, erichards Bay. Uzothandazela ukuthi i-asande ishaye injampela yakwanongoma, ngosuku olufanayo eprince Mangosuthu Stadium, Olundi.
Umkhokhiseni Mpanza ongusihlalo womsinga, uthe angaphezu kweshumi amabhasi abalandeli babo azosuka emsinga ebheke eharry Gwala.
"Ngokubona kwami, iqembu elizonqoba ngesonto ilona elizoya kumaplay-offs kazwelonke. Izinga abelinyuse kakhulu kule sizini amaqembu. Siya kulo mdlalo singenamdlali olimele. Ekhempini yethu kuvunguza umoya wokunqoba," kubeka umpanza.
Kuzokhumbuleka ukuthi iqembu lakhe ilona ebelimele ikwazulu-natal kuma-abc Motsepe League National Play-offs, ngojuni, nyakenye, khona eharry Gwala kodwa lagcina likhale ngaphansi.
Unkosingiphile Ntinga ocija umkhambathi, uthe: "Izinto zivuna thina. Yithi esiqhwakele futhi sidlalela ekhaya. Ngeke sivume ukuthi usiphuce ithuba lokumela isifundazwe sethu emidlalweni yokuhlungela ukwenyukela kwimotsepe Foundation Championship. Baphila saka bonke abafana bethu."
Amaqembu azonqoba kuma-stream womabili, azobe esehlunga ukuze kuphuma iqembu elizomela isifundazweni emidlalweni kazwelonke.
Unomkhosi Zulu oyisikhulu esiphezulu kwisafa, Kwazulu-natal, wazise Isolezwe ukuthi uzodlalwa ngo-ephreli 27 umdlalo wokuhlunga.
Uthe uzodlalelwa ethekwini, enkundleni esazomenyezelwa.
Udalule nokuthi kulo nyaka imidlalo kazwelonke yokuhlungela ukwenyukela kwimotsepe Foundation izogijinyelwa e-upington, enorthern Cape, ngojuni 3-9.