Rheenendal inwoner (106) ter ruste gelê
’n Bekende – en moontlik een van die oudste – inwoners van Rheenendal is onlangs oorlede.
Catherine Brinkhuis is gebore op 21 Januarie 1911 as een van vyf kinders, en is op die rype ouderderdom van 106 oorlede op 15 Julie vanjaar. Sy is te Rheenendal begrawe op 27 Julie.
Brinkhuis se nooiensvan was Boesak, en sy is in die Goukamma-distrik gebore.
Volgens haar susterskind Rosina Manewil, het Brinkhuis skool gegaan te Goukamma, maar moes sy skool verlaat op ’n vroeë ouderdom in graad 5 weens verskeie redes. Manewil het gesê Brinkhuis het later as huishulp in die omgewing begin werk.
Binnekort, volgens Manewil, het Brinkhuis haar toekomstige man Johannes (Brinkhuis) ontmoet, is haar eerste en enigste kind, ’n dogtertjie, gebore, en het die gesin Sedgefield toe verhuis. Johannes het in 1991 in ’n motorongeluk gesterwe.
Nadat Johannes se heengaan, het Manewil gesê, het Brinkhuis as huishulp by ’n vrou in Sedgefield begin werk en ingewoon. Sy het vir 28 jaar lank in Sedgefield gewerk en woon.
“Weens haar suikersiekte en hoë bloeddruk kon sy naderhand nie werk nie, en het sy by haar suster, my ma, in Rheenendal gaan woon, waar sy vir die afgelope 19 jaar gebly het tot haar afsterwe,” het Manewil gesê.
Brinkhuis laat haar dogter, een kleindogter, vier agterkleinkinders, en drie agteragterkleinkinders na.
Manewil het Brinkhuis beskryf as ’n baie goeie en stil mens, wat hardwerkend en baie vrygewig was. “As iemand in nood was, het sy hulle gehelp,” het Manewil gesê. “En sy het altyd van ’n goeie grappie gehou en lekker saam gelag,” het sy bygelas.
“Sy het defnitief ’n goeie lewe gehad. Daar is min van ons wat daardie ouderdom kan behaal!”
–