Skryf nou in vir spanskiet
Op 29 September bied die Eden-jaggeweerskietvereniging die Gong Team Challenge aan en nooi skuts van regoor die land uit om spanne in te skryf voor Dinsdag 25 September.
Grootste borgskap
Safari Outdoor het vir die tweede agtereenvolgende jaar een van die grootste borgskappe tot dusver in SuidAfrikaanse skietgeskiedenis
– meer as R300 000 se pryse – aangebied en Edenjaggeweerskietverening het die eer te beurt geval om hierdie skietkompetisie aan te bied op 29 September te Louvain-gasteplaas, 60km buite George.
Spanne van vier lede kan inskryf vir hierdie geleentheid, waar daar op 30 staalplate geskiet gaan word op ses verskillende bane oor onbekende afstande wat sal wissel van 150 tot 400m. Die bane se uitleg sal tipiese jag-situasies simuleer, en kan skuts verwag om te skiet oor rotse, boomstompe, driepootstokke en kontoerwalle.
Spanlede kan saamwerk met die afstandskatting en onderling bepaal wie die beste uit die moontlike sit-, staan- of lê-posisie vir die span sal presteer. Die borge het dit goed gedink om twee klasse te skep waarin spanne kan deelneem: Hardebaard, vir meer ervare kompetisieskuts; en Melkbaard, vir die meer sosiale klas.
Die dag word afgesluit met ‘n prysuitdeling en aansit-ete in Louvain se onthaalsaal, alles ingesluit by die inskrywingsfooi.
Inskrywings is reeds van regoor die land ontvang van so vêr as Gauteng, Natal en die Vrystaat.
Meer inligting hier
Kontak Jacques du Plooy op 082 940 0789 of Christo Delport op 079 498 6227 vir verdere besonderhede, of besoek www.so.co. za/pages/gong – Verskaf