FRANSE KROEGKOS
Genoeg vir 4 BESTANDDELE
1 kg stowebeesvleis 1 groot ui, fyngekap 2 mollige knoffeltoontjies, gekneus en fyngekap 2 koppies rooiwyn 1 groot wortel, geskraap en in muntstukkies gesny 3 bay leaves (lourierblare) 3 takkies tiemie ’n Handvol vars pietersielie, gekap 2 eetlepels olie plus nog 3 eetlepels vir braai 200 g dik spek, in repies gesny 1 eetlepel koekmeel Sout en varsgemaalde swartpeper na smaak 1 koppie beesvleisaftreksel 4 groot uie, in kwarte gesny (of 16 piekelgrootte uie) 1 x 250 g houer knopiesampioene, in skyfies gesny 1 eetlepel koekmeel 1 eetlepel botter
METODE
Plaas die stowevleis saam met die ui, knoffel, rooiwyn, wortel, bay leaves, tiemie, pietersielie en 2 eetlepels olie en laat staan oornag. Dreineer die vleis en groente en hou die vloeistof eenkant vir later. Verhit die olie vir braai in ’n swaarboomkastrol (wat dig met ’n deksel kan toemaak en in die oond kan gaan). Braai die spek daarin en voeg die gedreineerde vleis en groente by. Braai tot die vleis begin verkleur en sprinkel die 1 eetlepel koekmeel daaoor. Roer goed deur en roer die vloeistof waarin die vleis oornag gemarineer het, by. Voeg die aftreksel by en bring die mengsel tot kookpunt. Geur met sout en peper. Bedek die pot en plaas in ’n voorverhitte oond van 180°C vir ’n uur lank. Voeg die uie en sampioene by en plaas terug in die oond vir ’n verdere 30 – 45 minute of tot die vleis murgsag is en van die bene afval. Die pot gaan baie souserig wees, so maak ’n pasta van die 1 eetlepel koekmeel en 1 eetlepel botter (2 – 3 van elk indien nodig) en roer deur die pot. Kook oor matige hitte tot die sous begin dik word. Roer en voeg nog sout en peper by indien nodig. >>