DUBBELE BIEFBURGER

Lewer 2 dubbelburgers

Die lekkerte van so ’n burger is dat jy dit maklik kan opdollie nes jy wil – dink bros blare en tamatie, of camembert en bosbessiesous . . . Speel na hartelus met die variasies.

BESTANDDELE

1 klein ui, baie fyngekap 10 ml olyfolie 5 ml fyn koljander 5 ml fyn komyn 3 ml rissiepoeier 15 ml blatjang 500 g beesmaalvleis 50 ml droë broodkrummels 15 ml kappertjiesaad, gekap 30 ml pietersielie, fyngekap 15 ml elk olyfolie en botter 4 skywe verouderde cheddarkaas Peperwortelsous (horseradish) Roket 2 groot rolletjies 2 gebakte eiers, kersietamaties en uieringe (opsioneel) Sout en peper na smaak

METODE

1. Braai die ui stadig in die olie tot glansend, maar nie gekleur nie. Voeg die speserye by en braai vir nog ’n halfminuut tot geurig. Roer die blatjang by en verwyder dit van die hitte. Laat die uimengsel effens afkoel en meng dit deur die maalvleis saam met die broodkrummels, kappertjiesaad en pietersielie. Geur met sout en peper na smaak en verdeel in 4 ewe groot koekies. 2. Smelt die botter en olie saam in ’n oondvaste pan en braai die vleiskoekies (patties) versigtig tot goudbruin alkante. Sit nou die pan in ’n voorverhitte oond van 180°C vir sowat 15 minute – die vleis moet nog sappig wees. Sit die laaste 5 minute ’n skyf kaas op elke vleiskoekie sodat dit lekker kan smelt. 3. Sny die broodrolletjies oop en smeer met peperwortelsous; laai dit met roket, gevolg deur twee vleiskoekies. As jy ekstra dekadent wil wees, voeg ’n gebakte eier, kersietamaties en uieringe by.